Хадаар нэһилиэгэ үгэс быһыытынан Улуу Кыайыы параадыгар кыттыыны ылла.
Ыам ыйын 9 күнэ-Улуу Кыайыы өрөгөйдөөх күнэ. Дойдубут бары олохтоохторугар дириҥ өйдөбүллээх ытык күн. Бу күн сүһүөхтээх бэйэбит сүгүрүйэн туран Аан дойдуну өстөөхтөн босхолообут кыайыылаах көлүөнэҕэ дириҥ махталбытын тиэрдэбит! Үгэс быһыытынан Хадаар нэһилиэгин күүстээх аҥардара Кыайыы параадыгар кыттыыны ыллылар. Хадаар, Дириҥ нэһилиэктэрин холбоһуктаах колонналара «Боотур Уус» стадиоҥҥа чиҥник үктээн, биир кэккэнэн хааман киирдилэр. Колоннаны С.Д.Флегонтов аатынан Хадаар орто оскуолатын историяҕа учуутала, кэскиллээх ыччаппыт Иннокентий Яковлев салайан киллэрдэ.
Хорсун хоодуот саллааттарбыт ааттара үйэлэргэ умнуллубатын!
Үөрүүлээх миитиҥҥэ Улуу Кыайыы 81 сылынан эҕэрдэлээн, «Чурапчы улууһа» МО баһылыга Степан Саргыдаев Хадаар нэһилиэгин олохтооҕор, үлэ, тыыл бэтэрээнигэр, Хоту көһөрүллүү кыттыылааҕар, СӨ тыатын хаһаайыстыбатын бэтэрээнигэр, СӨ «Ытык аҕа», «Ытык кырдьаҕас» бэлиэлэр хаһаайыныгар, Хадаар нэһилиэгин Бочуоттаах олохтооҕор, 13 оҕо амарах аҕатыгар Дмитрий Константинович Лукҥҥа «Чурапчы улууһун Бочуоттаах олохтооҕо» дастабырыанньаны туттарда. Ытык киһи Улуу Кыайыы күнүнэн эҕэрдэлээн, кэлэр кэнчээри ыччакка алгыс тылын тиэртэ.
Дмитрий Константиновичка нэһилиэгин, улууһун, өрөспүүбүлүкэ сайдыытыгар үгүс кылааккын киллэрэн, күн бүгүнүгэр диэри чэгиэн сылдьаргыттан киэн туттабыт. Кырдьар диэни билиммэккэ, тапталлаах оҕолоруҥ, сиэннэриҥ ортолоругар, сайаҕас сыһыаннарынан угуттанан үөрэ-көтө, чэгиэн-чэбдик сылдьаргар, дьоллоох уһун олоҕу баҕарабыт.
Ким да умнуллубат! Туох да умнуллубат! Кыайыыны ситиспит хорсун-хоодуот санаалаах буойуннарга, сэрии, тыыл бэтэрээннэригэр, анал байыаннай дьайыы кыттыылаахтарыгар сүгүрүйэн туран кинилэр үрдүк ааттарыгар барҕа махтал тылларын аныыбыт!