Дойдубут кэрэтин арыйар, саҥа айымньылары тиһэр сайыҥҥы пленэр.
Сайыҥҥы сылаас күннэри баттаһа биир дойдулаахтарбыт Россия уонна Аан дойду творческай худуоһунньуктарын федерациятын союһун чилиэннэрэ Илья Дьяконов, Варвара Божедонова төрөөбүт дойдубут кэрэ көстүүтүн киистэнэн хоһуйууга анаммыт маастар-кылаас ыыттылар.
Бэйэбит идэтийбит худуоһунньуктарбыт сирдээн-көрдөрөн, өҥү дьүөрэлээн, айылҕа көстүүтүн ис тутулун биэрэргэ үөрэттилэр. Маастар кылаас кэмигэр кэрэни кэрэхсээччилэр, «Көмүс киистэ» түмсүү уруһуйдьуттара айылҕалыын алтыһан, тэҥ быһыыны-майгыны булан, өрө көтөҕүллэн дойдубут кэрэтин дуоһуйа холустаҕа түһэрдилэр.
«Бүгүҥҥү күн «в копилку воспоминаний» чахчы киирэр. Айылҕа туран биэрдэ, ип итии куйаас буолуо диэн куттана санаабытым. Хата Илья олорор сирбитин, уруһуйдуур көстүүбүтүн барытын талан олус үчүгэйдик тыа күлүгэр олордон астыктык уруһуйдаатым. Барытын быһааран, көрдөрөн аттыбытыгар олорон тэҥҥэ уруһуйдаабыккар, уруһуйдуурга аналлаах сүбэлэрин иһин махтал!»
«Бэйэбэр элбэҕи ылынным, сайдарга-үүнэргэ биир үктэл үрдээтим, айар үлэҕэр өссө кэрэ көстүүлэри, биир санаалаах элбэх доҕоттору. Доруобуйаны, дьолу баҕарабын»
«Хаһан да киистэ да, харандаас да тутан көрбөтөх учууталын Илья үөрэтэн уруһуйдатта. Үлэм түмүгүттэн бэйэм да наһаа үөрдүм, астынным. Мин гуашь кыраасканан уруһуйдаатым. Көрүҥ, сыаналаан! Эһиил эмиэ табылыннаҕына дойдубутугар кэлэ сылдьан тэрээһин ыытыахпыт диэтилэр. Үчүгэй маастар-кылаас ыыппыттарыгар ситиһиини баҕаран махтанабыт»-диэн Ирина Филиппова, Зинаида Теренкова, Татьяна Осипова санааларын үллэһиннилэр.
Идэлээх дьону кытта алтыһыы, кэпсэтии, уруһуйдааһын – бу дьиҥнээх баай! Пленэргэ идэлээх худуоһунньуктары кытта алтыһан, кэпсэтэн, уруһуйдаан, бэйэбит сатабылбытын өссө сайыннарар, саҥа дьиктилээх арыйыылары оҥорор, уопуту атастаһар олус улахан кыаҕы ыллыбыт.
Маннык түгэн — айымньылаах дьоҥҥо дьиҥнээх бэлэх, харах аһар, санаа сайыннарар кэм. Биир санаалаах дьону кытта бииргэ айар, кэрэни кэрэхсиир – олоххо дьолу эрэ аҕалар диэн Илья Иннокентьевичка, Варвара Петровнаҕа улахан махталбытын биллэрэбит!
