Улуу Кыайыыга анаммыт сэттиэлэ сонуннара. Хадаар нэһилиэгэ.
Бу күннэргэ байыаннай дьайыыга кытта сылдьар биир дойдулаахтарбытыгар анаан хаххалыыр аналлаах маскировочнай сеткалары баайыы салҕанна. Билигин суол сабыллан турар кэмигэр инникиттэн ордубут сеткаларга аналлаах спандбонд материалтан сеткалар уонна нашлемниктар оҥоһуллан бэлэмнэннилэр. Илиибит сылааһын иҥэрэн үтүө дьыалаҕа кыттыспыт дьоммутугар махтанабыт.
Сахабыт сирин оскуолаларыгар Өрөспүүбүлүкэ күнүн көрсө “Символы Якутии: Я — патриот” төрөөбүт кыраайдарын үөрэтэр олимпиада муус устар 23 күнүгэр буолан ааспыта. Бу олимпиаданы СӨ национальнай библиотеката, “ДТК — Центр чтения”, “Движение первых” сүрүннээн тэрийбиттэрэ. Олимпиадаҕа Хадаар орто оскуолатын 2-3 кылаас үөрэнээччилэрэ кыттыыны ылан, бэйэлэрин холонон көрбүттэрэ. Ыам ыйын 4 күнүгэр түмүк тахсан С.Д.Флегонтов аатынан Хадаар орто оскуолатын 2-с кылааһын үөрэнээччитэ Алина Артемьева олимпиада улуустааҕы этаабыгар III миэстэни ылан дипломунан бэлиэтэннэ.
Үтүө үгэс быһыытынан ыам ыйын 6 күнүгэр С.Д.Флегонтов аатынан Хадаар орто оскуолатын коллектива Кыайыы пааматынньыгар ырааһырдыы субуотунньугар тахсан, биир киһи курдук көхтөөхтүк куулларын, кыраабылларын туппутунан күргүөмнээхтик үлэлээтилэр. Сэрии бэтэрээннэрин пааматынньыга, тулата ыраастанан күүс-көмө буолбут оскуола коллективыгар махталбытын биллэрэбит.
“КЫАЙЫЫ” историческай лотуо-оонньуу нөҥүө чахчылары үөрэтиигэ, билиини хаҥатыыга, Ийэ дойдуга бэриниилээх буолууга, Аҕа көлүөнэҕэ дириҥ ытыктабылы үөскэтиигэ олоҕуран оҥоһуллубут биллэрэр-көрдөрөр оонньуу.
Улуу Кыайыы күнүн көрсө ыам ыйын 6-7 күннэригэр, нэһилиэк библиотекатыгар «КЫАЙЫЫ» оонньуулар буолан аастылар. Дьон-сэргэ истэн, сэргээн оонньуу 2 күн ыытылынна. Түмүккэ кыайыылаахтарынан Февронья Никонова, Мотрена Дьячковская, Сардана Титова та5ыстылар.
Ыам ыйын 9 күнэ — үрдүк өрөгөй Улуу Кыайыы күнэ! Ыам ыйын 8 күнүгэр нэһилиэкпитигэр Кыайыы күнүн парада ытык дьоммутугар – сэрии уонна тыыл бэтэрээннэригэр убаастабылынан, кинилэр хорсун быһыыларыгар киэн туттуунан, сырдык ааттарын үйэтитии бэлиэтинэн саҕаланна.
Тыаллаах, чаҕылхай күннээх сарсыарда нэһилиэкпит дьоно-сэргэтэ, үүнэр көлүөнэ ыччаппыт кыттыылаах парадка сэлэлии хааман пааматынньыкка тиийэн үөрүүлээх миитин ыытылынна.
Миитин Улуу Кыайыыны аҕалсыбыт буойуннары кэриэстээн чуумпуруу мүнүүтэнэн, Кыайыы пааматынньыгар венок ууруутунан саҕаланна. «Хорсун» оҕо-ыччат байыаннай-патриотическай кулуубун кыттыылаахтара (сал. П.П.Соловьев) байыаннай хамсаныылары көрдөрдүлэр.
Аҕа дойду Улуу сэриитигэр бэйэлэрин олохторун толук ууран туран хорсуннук сэриилэһэн Улуу Кыайыыны аҕалсыбыт, тыылга күүстээх үлэлэринэн Улуу Кыайыыны уһансыбыт аҕа көлүөнэ дьоннорбутун чиэстээн, Анал байыаннай дьайыыга дойдубутун көмүскээбит, көмүскүү сылдьар буойуттарбытын ахтан-санаан истиҥ махтал тылларын «Хадаар нэһилиэгэ» тыа сирин түөлбэтин баһылыга Афанасий Афанасьевич Степанов, Чурапчы улууһун социальнай харалтатын салайааччыта Лидия Васильевна Тосукаева, ытык кырдьаҕаспыт, Хоту көһөрүллүү кыттыылааҕа Дмитрий Константинович Лукин эттилэр.
«Чурапчы улууһа» муниципальнай оройуон салалтатын уонна депутаттарын Сэбиэтин, «Хадаар нэһилиэгэ» тыа сирин түөлбэтин дьаһалтатын ааттарыттан эҕэрдэ суруктары, бэлэхтэри туттардылар.
Сылын ахсын үгэс буолбут полевой кухняны олохтоох дьаһалта үлэһиттэрэ тэрийэн итии чэйинэн, сылаас аһынан миитин кыттыылаахтарын күндүлээтилэр.
Кыайыы күнүгэр аналлаах үөрүүлээх тэрээһин Кыайыы вальсын үҥкүүтүнэн түмүктэннэ.
Убаастабыллаах нэһилиэкпит олохтоохторо, тэрилтэлэрэ, үүнэр көлүөнэ ыччаттара Кыайыы параадыгар тэринэн кэлэн көхтөөхтүк кыттыбыккытыгар барҕа махталбытын тиэрдэбит.
ТОСХОЙДУН ЭЙЭЛЭЭХ ОЛОХ, ТУРУГУРДУН УЛУУ КЫАЙЫЫ!