Саҥа газ котельнай күөх төлөн утаҕар холбонон үөрүүлээх арыллыыта.
Сэтинньи 11 күнүгэр Хадаар нэһилиэгэр биир үөрүүлээх күнүнэн бэлиэтэннэ. Ол курдук нэһилиэкпитигэр газ котельнайын саҥа дьиэтэ дьэндэйдэ. Котельнай Москватааҕы ООО «Экотехинвест» хампаанньа үбүлээһининэн тутулунна. Саха Өрөспүүбүлүкэтигэр бэрэстэбиитэлэ Андрей Александрович Копылов салайааччылаах, урбаанньыт Михаил Михайлович Пинигин бэдэрээччиктээх биригээдэлэр туттулар.
Алгысчыт Николай Григорьев аал уотун арыылаах алаадьынан, саламаатынан айах тутан кэскиллэрэ кэҥээтин, уруйдара ууһаатын диэн бары тутааччыларга, төрөөбүт түөлбэбит өссө да саҥа тутууларынан дьэндэйэ турарыгар алгыс баһын сыалаата .
Саҥа тутуу үөрүүлээх чааһыгар нэһилиэкпит ытык кырдьаҕаһа Дмитрий Константинович Лукин, «Хадаар нэһилиэгэ» тыа сирин түөлбэтин баһылыга Афанасий Степанов, Чурапчы улууһун олох-дьаһах коммунальнай хаһаайыстыба тэрилтэтин кылаабынай инженера Иван Макаров кыттыыны ыллылар, аалай лиэнтэни быһан Хадаар нэһилиэгин олохтоохторун, тэрилтэлэрин сылааһынан хааччыйдылар.
Нэһилиэнньэлээх пууннары гаастааһын олох таһымын үрдэтиигэ инники күөҥҥэ тутулларын бэлиэтээн эҕэрдэ тыллар этилиннилэр, бэлэхтэр туттарыннылар.
Саха сиэринэн, өбүгэ үгэһинэн кэлбит ыалдьыттары, нэһилиэк олохтоохторун арыылаах алаадьынан, саламаатынан, быырпаҕынан айах туппут Чурапчытааҕы олох-дьаһах коммунальнай хаһаайыстыба тэрилтэтин үлэһиттэригэр, олохтоох тыа сирин түөлбэтин коллективыгар махтанабыт. Күөх төлөн- олох кэскилэ буолан, газ котельнай сайдыы өссө биир үктэлэ буолан олоххо киирэн, тыйыс тымныыларга сылааһынан угуттуу турдун.