Нэдиэлэ чөл күнүгэр алтынньы ый солуннара.
Алтынньы 3 күнүгэр нэһилиэкпитигэр «Осенняя ярмарка-гаражка» атыы-тутуу тэрээһинэ ыытылынна. Манна кэтэх хаһаайыстыбалаахтар араас бородууксуйаларын, заготовкаларын, таҥас-сап атыыга турда. Маны тэҥэ минньигэс тортар, бэл диэтэр эмтээх, ыраастыыр оттор атыыланнылар. Бу тэрээһиҥҥэ кыттыбыт Далбар Хотуттарга махталбытын тиэрдэбит.
Алтынньы 7 күнүгэр «Якутия — Земля героев» кадровай бырагыраама кыттааччыта Анатолий Павлович Стручков Хадаар нэһилиэгэр кэлэн биир күн устата нэһилиэк дьонун-сэргэтин, оҕотун-уруутун, тэрилтэлэрин кытары көрсөн үлэлээтэ. Анатолий Павлович бырайыакка кыттыы улахан эппиэтинэстээҕин, суолталааҕын туһунан иһитиннэрии оҥордо.
Салҕыы «Мичил» уһуйаан (сэб. Гаврильева М.А.) үлэһиттэрин, иитиллээччилэрин кытары көрүстэ, уһуйаан үлэтин-хамнаһын кытары билистэ. С.Д.Флегонтов аатынан Хадаар орто оскуолата (дир. Тарасов П.П,) дойдубут Өрөгөй ырыаларынан линейкаҕа көрүстэ, оскуола олоҕун сырдатар стендэлэринэн оҕолор оскуоланы билиһиннэрдилэр, сырдатыылары көрдөрдүлэр. Оскуола, музей үлэлэрин сиһилии кэпсээтилэр. «Хорсун быһыы» аһаҕас уруогар улахан сүһүөх кылааһын үөрэнээччилэрэ анал байыаннай дьайыы бэтэрээниттэн Анатолий Павловичтан: связист буоларга сүрүннээн тугу билэр наадатын, разведчик буоларга киһи ханнык хаачыстыбалардаах буолуохтааҕын, учууталлаабыт кэмнэрин, СВО кыттыылаахтарыгар анаан ыытар суруктара, харысхаллара кырдьыктыы тиийэллэрин туһунан боппуруостары биэрэн хоруй ыллылар. Кэлэр кэнчээри ыччакка сүбэтин, баҕа санаатын иһиттилэр. Бу уруоктан оҕолор хорсун быһыы, тулуур, кыайыыга эрэл, Ийэ дойдуга бэриниилээх буолуу туһунан сэргээн истэн, билэн Анатолий Павловичка махтанан бэлэх туттаран тарҕастылар.
Салҕыы нэһилиэк тэрилтэлэрин кытары билсэн, көрөн-истэн, кэккэ боппуруостары быһаарсыыга ылсан сүбэ-ама биэрдэ. Истиҥ көрсүһүүгэ «Хадаар нэһилиэгэ» тыа сирин түөлбэтин баһылыга Афанасий Степанов Анатолий Павловичка улуус, өрөспүүбүлүкэ сайдыытыгар сүҥкэн кылаатын киллэрсэ сылдьарын бэлиэтээн махтал суругун, нэһилиэк бэлиэтин туттарда.
Алтынньы 1 күнэ аан дойдутааҕы аҕам саастаахтар күннэрэ. Хадаар нэһилиэгэр аҕа саастаахтар декадаларын чэрчитинэн алтынньы 8 күнүгэр нэһилиэк библиотекатыгар дьоммут-сэргэбит литературнай тургутукка көхтөөхтүк кытынныллар. 5 түһүмэхтээх оонньууга «Алгыс», «Сардаҥа», «Көмүс күһүн», «Дьүөгэлэр» хамаандалара эгил-тэгил түсүһэн оонньууга кыһаллан туран кытынныллар. Түмүккэ кыайыылааҕынан «Көмүс күһүн» хамаанда тахсан бэлэҕинэн, добун суругунан бэлиэтэннэ. Кыттыбыт хамаандаларга туоһу сурук туттарылынна.
Алтынньы 9 күнүгэр аҕам саастаахтар күннэрин декадатын чэрчитинэн «Тускул» култуура уонна спорт киинигэр Хоптоҕо нэһилиэгиттэн сиэл маастара Евдокия Павлова, оҕуруо тиһиитигэр Нарыйа Мартьянова маастар кылаастары ыыттылар. Баҕалаахтар бу күн кэлэн кэрэ эйгэ кистэлэҥнэрин биллилэр, ирэ-хоро сэһэргэстилэр.
С.Д.Флегонтов аатынан Хадаар орто оскуолатыгар «Движение первых» бастыҥнар хамсааһыннарын тэрийиитинэн «Герои среди нас» аахсыйа чэрчитинэн нэһилиэк библиотеката туруорбыт «СВОи герои» быыстапка турда. Быыстапка биир дойдулаахтарбытыгар анал байыаннай дьайыы байыастарын хорсун-хоодуот быһыыларыгар ананна. Быыстапка сүрүн сыала — олохторун толук уурбут байыастары кэриэстээһин, Ийэ дойдуга бэриниилээх, дьиҥнээх патриот буолууга иитии. Директоры иитэр үлэҕэ солбуйааччы Лидия Ивановна Лукина кэпсиирин оҕолор сэргээн иһиттилэр, боппуруостары биэрдилэр. Маны таһынан «КнигСВОд» кинигэнэн быыстапка турда. Бу кинигэлэри оҕолор уларсан ааҕыахтарын сөп.
