Дьоһун саас дьоро күнэ.
Yтүмэн үлэ, үтүө майгы, чөл олох — үйэ саас кэрэһитэ. Алтынньы — кыстык маҥнайгы ыйа сатыылаан турдаҕына, ыйга айылҕа киһини, дьону-сэргэни түмэр күүһэ сиргэ чугаһыыр кэмигэр Чурапчы улууһун Хадаар нэһилиэгэр үлэ, тыыл бэтэрээнэ, Хоту көһөрүллүү кыттыылааҕа, Саха АССР V ыҥырыылаах Үрдүкү Сэбиэтин депутата, Бурятскай АССР дьахталларын бастакы съеһин делегата, Чурапчы улууһун бочуоттаах бэтэрээнэ, Хадаар нэһилиэгин, Чурапчы улууһун Бочуоттаах олохтооҕо, нэһилиэк ытык кырдьаҕаһа ытыктабыллаах Марфа Васильевна Никитина 95 сааһын дьоро күнэ бэлиэтэннэ.
Марфа Васильевнаны орто дойдуга төрөөн-үөскээн 95 сааһын томточчу туолбут кэрэ-бэлиэ кэрдиис кэминэн иэйиилээх иһирэх эҕэрдэлэрин, уруйдаах алгыстарын нэһилиэк олохтоохторо, ыҥырыылаах ыалдьыттара тиэртилэр. Тэрээһин Марфа Васильевна үлэттэн дьолун булбут хоһуун киһи олоҕун, үлэтин кэрчиктэрин кэпсиир хаартыска презентациянан саҕаланна. Ол курдук «Хадаар нэһилиэгэ» тыа сирин түөлбэтин баһылыга Афанасий Степанов ытык кырдьаҕаска Дойду Бэрэсэдьиэнэ В.В.Путин, Саха Өрөспүүбүлүкэтин Ил Дархана А.С.Николаев эҕэрдэ суруктарын, нэһилиэк сайдыытыгар киллэрбит сүҥкэн кылаатын иһин Хадаар нэһилиэгин «Ытык Саас» бэлиэтинэн наҕараадалаата.
Салҕыы эҕэрдэ тыллары «Чурапчы улууһа» муниципальнай оройуон дьаһалтатын дьиэ кэргэн уонна оҕо салаатын сүрүннүүр исписэлииһэ Татьяна Петровна Бушкова, СӨ үлэҕэ уонна социальнай сайдыыга Министерствотын иһинэн Чурапчы улууһун үлэҕэ уонна нэһилиэнньэ социальнай көмүскэллээх буолууга управление салайааччыта Лидия Васильевна Тосукаева, нэһилиэк тэрилтэлэрэ, түмсүүлэрэ, үөлээннээхтэрэ, бииргэ төрөөбүттэрэ, оҕолоро истиҥ тыллардаах, ырыалаах эҕэрдэлэрин тиэртилэр.
Марфа Васильевнаҕа Чурапчы улууһун сайдыытыгар киллэрсибит кылаатын, өр сыллаах үтүө суобастаах үлэтин иһин «Чурапчы улууһа» муниципальнай оройуон баһылыгын, улуустааҕы депутаттар сэбиэттэрин бэрэссэдээтэлин эҕэрдэ суругун уонна оройуон иннигэр өҥөлөрүн иһин I истиэпэннээх бэлиэтинэн наҕараадалаатылар. Чурапчы улууһун тыатын хаһаайыстыбатын сайдыытыгар киллэрсибит сүҥкэн кылаатын иһин ытык киһиэхэ тыа хаһаайыстыбатын бэлиэтин туттардылар.
Марфа Васильевна кэлбит дьоҥҥо-сэргэҕэ махтанан туран кэс тылын тиэртэ, бары үчүгэйи баҕарда. Үбүлүөйдээх тэрээһиҥҥэ кыттыыны ылбыт «Далбарай» фольклорнай ансаамбылга (сал. Яна Климова, Елена Харитонова), Марфа Артемьеваҕа, бары көрөөччүлэрбитигэр махталбытын биллэрэбит.
Ытык киһибитигэр Марфа Васильевнаҕа баҕарабыт күн-дьыл өксүөнүн билиммэккэ, оҕолоруҥ, сиэннэриҥ, чугас дьонуҥ тапталларыгар бигэнэн, истиҥ-иһирэх сыһыаннарыгар, өйөбүллэригэр уйдаран өссө уһуннук олороргор!