«ИЭЙИИМ КЫЛЫН ТААРЫЙАН КЭРЭ КӨСТҮҮ АЙЫЛЛАР…» ураты иэйиилээх быыстапка арылынна.
Бэс ыйын 3 күнүгэр Хадаар нэһилиэгэр «Көмүс Киистэ» уруһуйдьуттар, «Эксклюзив» коллекционердар түмсүүлэрин чилиэнэ, Хадаар нэһилиэгин Норуотун маастара, сцена ветерана, улуус, өрөспүүбүлүкэ уруһуй куонкурустарын лауреата, дипломана ЗИНАИДА НИКОЛАЕВНА ТЕРЕНКОВА «Иэйиим кылын таарыйан кэрэ көстүү айыллар…» тус быыстапкатын түһүлгэтигэр ыалдьыттары түмтэ.
Кэрэ алып саалатыгар Зинаида Николаевна талааннаах тарбахтарынан, көрүүтүнэн орто дойду олоҕун, кэрэтин остуоруйата холустаҕа түһэн кэрэтэ бүтүннүү ыйаммыт, нарын тарбахтарынан чочуйан оҥорбут араас оҥоһуктарын, мунньуу коллекциятын тула муһуннубут. Быыстапка аалай лиэнтэтин быһа кырыйан кэлбит ыалдьыттары Зинаида Николаевна уруйдуу-айхаллыы көрүстэ.
Быыстапка арыллыытыгар Зинаида бииргэ үөрэммит дьүөгэтэ, биир дойдулаахпыт СӨ култууратын үтүөлээх үлэһитэ, СӨ култууратын, үөрэҕириитин туйгуна Вера Никитична Старкова удьуор утум, айар-тутар дьоҕур Зинаида ийэтиттэн саҕаламмытын уонна хартыыналары ырытан сырдаппыта ураты буолла.
Эҕэрдэ тыллары «Хадаар нэһилиэгэ» тыа сирин түөлбэтин баһылыгын солбуйааччы Перизат Дьячковская, «Тускул» култуура уонна спорт киинин коллектива, директор Николай Дьячковскай, бииргэ үөрэммиттэрэ, дьүөгэлэрэ эттилэр, бэлэхтэрин туттардылар.
Зинаида Николаевнаҕа айар-тутар эйгэлээх аартыгын өссө да кэҥээн, арыллан иһэригэр баҕарабыт!
Быыстапкаҕа турбут оҥоһуктар чахчы даҕаны хас биирдии дьон болҕомтотун тардар ураты күүстээхтэр. Айар быыстапката бэс ыйын 14 күнүгэр тыа сирин сайдар киинигэр, 2 этээс саалатыгар туруоҕа. Нэһилиэкпит олохтоохторун, ыалдьыттарын сэргэх, сонун быыстапканы кэлэн сэргии, кэрэхсии көрөргүтүгэр ыҥырабыт.