«Уруйдуубут Улуу Кыайыыны!». Хадаар нэһилиэгэ улуус киинигэр Улуу Кыайыы үбүлүөйдээх дьаһалыгар кыттыыны ылла.
Кыайыы күнүн бэлиэтээһин аҥардас улуу түгэни чиэстээһин эрэ буолбатах. Аҕам саастаах, ытык көлүөнэлэр албан ааттаах бойобуой суолларын холобуругар эдэр көлүөнэни иитэр улахан суолталаах.
«Үйэлээх уот» мемориалга Кыайыы 80 сылыгар анаммыт митинг кэннэ бырааһынньыктыы колонналар бииртэн-биир аастылар. Инники колоннаҕа «Өлбөт үйэлээх полкатыгар» Аҕа дойду сэриитин, көһөрүллүү кыттыылаахтарын мэтириэттэрин чиэстээхтик, күөрэччи тутан Хадаар нэһилиэгэ инники колоннаҕа хаамтыбыт.
«Боотур Уус» стадиоҥҥа параады майор, сэбиэскэй-партийнай үлэ бэтэрээнэ Семен Никитин салайда. Хадаар, Арыылаах нэһилиэктэрин холбоһуктаах колонналара чиҥник үктээн, биир кэккэнэн хааман киирдилэр.
Улуус баһылыга Степан Саргыдаев олохтоохтору, сэрии кэмин оҕолорун, огдооболорун, Көһөрүллүү кыттыылаахтарын,тыыл бэтэрээннэрин, бойобуой дьайыы бэтэрээннэрин уонна байыаннай дьайыы кыттыылаахтарын Улуу Кыайыы күнүнэн эҕэрдэлээтэ. Байыаннай дьайыы кыттыылааҕын Николай Мордускины «За проявленное мужество и отвагу» түөскэ кэтиллэр бэлиэнэн наҕараадалаатылар. Сэрии огдооботун, тыыл бэтэрээнин Александра Софронованы, тыыл бэтэрээнин Марфа Никитинаны «Чурапчы улууһун Бочуоттаах олохтооҕо» ааты ылбыттарынан эҕэрдэлээтилэр.
Сэрии хонуутугар охтубут буойуннарга үйэлэргэ албан аат! Туругурдун Кыайыыны аҕалбыт норуот!
Аҕа дойду Улуу сэриитигэр Кыайыы 80 сылынан!