Нэдиэлэ сонуннара
Кырыа кыһыммыт ааһан, аламай күммүт сылааһынан илгийэн муус устар 1 күнүгэр, көр-күлүү күнүн көрсө нэһилиэк бэтэрээннэрэ сааскы сибиэһэй салгыҥҥа тахсан оонньоон-көрүлээн биир үтүө күнү атаардылар.
Эбэлэрин арыылаах алаадьынан аһатан күндүлээтилэр. Көмүрүө хаары баһа оонньоон, сүүрэн-көтөн, “былаах былдьаһа” оонньоон, мас тардыһан, футбол мээчиги тэбэн күрэхтэргэ кытыннылар. Бириистээх миэстэлэргэ тиксэн бэлэх туттулар.
Өрө күүрүүлээх, тыҥааһыннаах киирсии кэнниттэн салҕыы байанайдаах уолаттар Владимир Спиридонов, Афанасий Андросов, Василий Лукин куйуурдуулларын көрдүлэр, балык тутан үөрэн-көтөн, илии тутуурдаах, өттүк харалаах дуоһуйа оонньоон, үөрэн-көтөн тарҕастылар.
«Мария Романовнаҕа, Мотрена Николаевнаҕа маннык сэдэх тэрээһини толкуйдаан күндүлээбиккитигэр ураты махтал, өссө даҕаны толкуйгут тобулла туруохтун. Бүгүҥҥү күммүт, сибиэһэй салгыны ыймахтаабыппыт, күлэн-үөрэн сэргэхсийбиппит турукпутун тупсарыахтын… Дьоллоох ыаллар, оҕолор дьоллоох ийэлэрэ, эбэлэрэ буолуохайын» диэн махталларын этэллэр.
Муус устар 2 күнүгэр Төлөйдөөҕү «Өбүгэ ситимэ» куруһуок салайааччыта Наталья Егоровна Гуляева ыҥырыыбытын ылынан туой оҥоһукка маастар-кылаас ыытта. Уопсайа 17 кэрэ аҥар туой оҥоһугу оҥорон күммүт биллибэккэ ааста. Наталья Егоровна үлэтин-хамнаһын, туой кистэлэҥнэрин, эмтиир күүстээҕнн туһунан билиһиннэрдэ, туойунан куруһуок тэринэн үлэлиирбитигэр баҕа санаатын эттэ.
Өбүгэлэрбит былыргыттан илдьэ кэлбит оҥоһуктарын утумнуу сылдьар киһини кэрэхсиэххэ эрэ сөп. Туойунан бары биирдии оҥоһугу илиибит иминэн имэрийэн, айан, чочуйан таһаардыбыт: буруолатар көмүлүөк, хомпуор, кытыйа арааһын, туой иһиттэри, лыҥкынас чуорааны.
Кэлбит дьон сөбүлээн, оҕолорго, улахан да дьоҥҥо былааҥҥа киллэрэн туойга үлэлэһиэхпит этэ, инникитин бу саҥа саҕалааһын кэскиллээх буоларыгар баҕа санаалаах тарҕастыбыт.Туойу билии, туһаҕа таһаарыы өссө да иннибитигэр.
Хадаар нэһилиэгэ спорт бары көрүҥнэринэн утумнаахтык дьарыктанар, улууска биир бастыҥ спортсменнардаах нэһилиэгинэн биллэр. 2022 сыллаахха саҥа успуорт киинэ арыллан үлэ-хамнас эрчимнээхтик барар. Нэһилиэк спортивнай хамсааһынын тэрийээччитэ Владимир Софронов туруорсуутунан, Зарина Лукина эскиһын толкуйдаан нэһилиэк сборнай хамаандатын спортсменнарыгар саҥа спортивнай формалары оҥотторон туттулар. Форманы күрэхтэһээччилэр комплекснай уонна да атын күрэхтэргэ парадтаан киириигэ кэтиэхтэрэ.
