«ЭКСКЛЮЗИВ» коллекционердар быыстапкалара
«ЭКСКЛЮЗИВ» коллекционердар түмсүүлэрэ нэһилиэк духуобунай олоҕун салайсаллар. Түмсүү муус устар 24 күнүгэр 2014 с. Хадаар нэһилиэгэр “Тускул” норуот айымньытын дьиэтин иһинэн библиотекаҕа кииннэнэн үлэтин саҕалаабыта. Бу күн нэһилиэк коллекционердарын түмэр сыаллаах “Эксклюзив” диэн ааттаах конкурс-выставка тэриллибитэ. Выставка кэнниттэн “Үйэлээҕи, туһалааҕы оҥорор, тэнитэр дьарык – өрүү көдьүүстээх, дьону түмэр айылгылаах” диэн санаанан салайтаран түмсүүбүт үлэтин саҕалаабыта. Түмсүүбүтүгэр 19 киһи сылдьар. Бары Далбар Хотуттар, ыал ийэлэрэ, эбэлэрэ.
Муус устар 15-19 күннэригэр нэһилиэк библиотекатыгар 10 сыллаах үбүлүөйүнэй ураты дьарыктаах дьоммут коллекцияларын быыстапката дьон көрүүтүгэр тэлгэнэн турда. Дьикти дьарыктаахтар быыстапкаҕа халандаардары, сувенирдары, статуэткалары, былааттары, колокольчиктары, оонньуур аттан саҕалаан, куукулалары, уруучкалары уо.д.а. киһи эрэ сөҕө, хайгыы, кэрэхсии көрөр малын-салын аҕалан туруордулар. Маны барытын кыратыттан улахан дьонугар тиийэ сылдьыбыт дьон сөхтө-махтайда, сэҥээрдэ.
«Эксклюзивтар» манан тохтоон хаалбакка, салҕыы 4 түһүмэхтэн турар онлайн-фотоконкурс ыыта сылдьаллар. Куонкурустар түмүктэрэ түмсүү тэриллибит күнүгэр муус устар 24 күнүгэр тахсыаҕа. Бу куонкурустарга коллекционердар туруорбут бириистэрэ, дипломнара туттарыллыахтара.