«Үрдэл». Кыһыны атаары, сандал сааһы көрсүү бырааһынньыгар түөлбэнэн күрэх
Кулун тутар 31 күнүгэр Хадаар нэһилиэгэр кыһыны атаарыы тэрээһинэ буолан ааста. Бу күн түөлбэлэр икки ардыларыгар араас көрдөөх, ыһыылаах-хаһыылаах конкурстар, күрэхтэр ыытылыннылар. Эрдэттэн биллэриллибит күрэхтэргэ түөлбэнэн кыттааччылар, эдэр ыччаттар эрдэттэн бэлэмнэнэн кэлэн үөрэ-көтө кыттан, күрэхтэһэн, илин-кэлин түсүһэн сэргэхсийэн тарҕастылар.
Көрдөөх частушкалары толорууга түөлбэлэр бары ох курдук оҥостон, дьэрэкээн былаатынан бүрүнэн, толору нуучча норуодунай инструменнарын туһанан ыллаатылар-туойдулар. «Эрэл» түөлбэ I миэстэ, «Кэскил» II миэстэ, «Сардаҥа» III миэстэни ылары ситистилэр.
Салҕыы 3 көрүҥ блины (саамай улахан, саамай чараас, оригинальнай) куонкурса ыытылынна. Түөлбэлэр биирдии остуолга буһаран аҕалбыт блиныларын дьон көрүүтүгэр ууран дьүүллүүр сүбэ иннигэр көмүскээтилэр.
Блины күрэҕэр «Сардаҥа» түөлбэ I миэстэ, «Эрэл» түөлбэ II миэстэ, «Кэскил» түөлбэ III миэстэни ыллылар.
Саамай күүтүүлээх, ыһыылаах-хаһыылаах көрүҥнэринэн канат тардыһыыта уонна чууккаҕа тоһоҕо саайыыта күрэхтэр буоллулар. Канат тардыһыытыгар түөлбэттэн 4 эр киһи, 4 дьахтар кыттыыны ыллылар.
Түмүккэ: «Кэскил» түөлбэ I миэстэ, «Эрэл» түөлбэ II миэстэ, «Сардаҥа» түөлбэ III миэстэни ыллылар. Саамай элбэх көрөөччүнү түмпүт тоһоҕо саайыытыгар түөлбэттэн 4-түү эр киһи күрэхтэстилэр. Барыларын куоһаран, бэлэмнээҕин көрдөрөн «Кэскил» түөлбэ иннин биэрбэтэ, «Эрэл» түөлбэ II миэстэ, «Сардаҥа» түөлбэ III таҕыстылар.
Бу курдук сандал сааһы бэрт көхтөөхтүк, сэргэхтик көрүстүбүт. Нэһилиэк олохтоохторо сылаас ас атыылаатылар, спринт-лотерея ыыттылар. Мэлдьи бу курдук түмсүүлээх, көхтөөх буолуоҕуҥ!
