Хадарская модельная библиотека

Тохсунньу 22 күнүгэр, Албан ааттаах ытык көлүөнэ дьоммут уһансыбыт Улуу Кыайыы үбүлүөйдээх 80 сылынан, Өрөспүүбүлүкэтээҕи «Бары бииргэ — Кыайыыга» девизтээх Кыайыы Знамятын Хадаар нэһилиэгэ үөрүүлээх быһыыга-майгыга көрүстэ.

Хадаар нэһилиэгэр, киэн туттар киһибит Аҕа дойду улуу сэриитин кыттыылааҕа, биэс бойобуой уордьан кавалера С.Д.Флегонтов аатын сүгэр Хадаар орто оскуолатыгар көрсөрбүт ордук эппиэтинэстээх уонна долгутуулаах буолла. Знамяны көрсүү тэрээһинигэр кыттыыны ыллылар Хадаар нэһилиэгин олохтоохторо, уопсастыбаннас, Хадаар орто оскуолатын үөрэнээччилэрэ, уһуйаан иитиллээччилэрэ, учууталлар, иитээччилэр.

Долгутуулаах тэрээһиҥҥэ Кыайыы Знамятын өрө тутан киллэрдилэр бойобуой дьайыы бэтэрээннэрэ Петр Сивцев, Илья Слепцов, Василий Монастырев уонна Хадаар орто оскуолатын бастыҥ спортсменнарыгар, уопсастыбанньыктарыгар, Знаменнай бөлөх хамандыыра Артур Степановка, Галактион Кондратьевка, Максим Собакиҥҥа туттардылар.  Үөрүүлээх түгэҥҥэ кэлбит нэһилиэк олохтоохторугар, кэнчээри ыччакка туһаайан эҕэрдэ тыллары «Чурапчы улууһа» (оройуона) муниципальнай оройуон депутаттарын Сэбиэтин бэрэссэдээтэлэ Яков Павлович Оконешников, «Хадаар нэһилиэгэ» тыа сирин түөлбэтин баһылыга Афанасий Афанасьевич Степанов, Хоту көһөрүллүү кыттыылааҕа, Хадаар нэһилиэгин Бочуоттаах олохтооҕо, нэһилиэк ытык кырдьаҕаһа Дмитрий Константинович Лукин эттилэр.

Эдэр көлүөнэ ыччат аатыттан үөрэнээччилэр Е.В.Харитонов-Саччай С.Д.Флегонтовка анаабыт «Биһиги геройбут» хоһоонун доргуччу аахтылар, пааматынньыгар сүгүрүйэн гирлянда уурдулар. Тэрээһин уопсай хаартыскаҕа түһүүнэн түмүктэннэ.

Улуу Кыайыы биһиэхэ чэпчэкитик кэлбэтэҕин, эйэлээх халлаан, дьоллоох олох туһугар олохторун да толук ууран, доруобуйаларын кэрэйбэккэ тыылга турууласпыт дьоммутугар ытык иэстээхпитин, тугунан да кэмнэммэт махталлаахпытын туоһулаан, Кыайыы Знамята история хаһан да сүппэт кэрэһитэ буолан үйэлэргэ күөх халлааҥҥа тэлимнии туруоҕа.