Егор Афанасьевич Борисов үбүлүөйдээх 70 сааһынан олоҕун уонна үлэтин туһунан сырдатыы.
Атырдьах ыйын 15 күнүгэр ытыктыыр биир дойдулаахпыт, бастакы Ил Дархан, билигин Арассыыйа Федерациятын сенатора Егор Афанасьевич Борисов 70 сааһын туолбута. Бу бэлиэ даатаны көрсө, улуустааҕы Е.А.Борисов аатынан архыып-библиотекатыттан көһө сылдьар быыстапканы Хадаар нэһилиэгин дьоно-сэргэтэ, ыччата көрдүлэр, сэҥээрдилэр. Быыстапка бастакы күн нэһилиэнньэҕэ ананан турда.
Иккис күн тэрээһин С.Д.Флегонтов аатынан Хадаар орто оскуолатын үөрэнээччилэригэр анаан ыытылынна. Педагог-библиотекарь Наталья Дмитриевна Лукина, «Хадаар кэскилэ» оҕо хамсааһынын сирдьитэ Лидия Ивановна Лукина «Киэҥ туттар киһибит» Е.А.Борисов туһунан видеоролигы көрдөрдүлэр, экспозицияны билиһиннэрдилэр.
Оҕолор экспозицияҕа турбут кинигэлэри, СӨ спортивнай тустууга федерациятын сувенирдарын сэҥээрэ көрдүлэр, тутан-хабан астыннылар, саҥаны арыйдылар.
Нэһилиэк библиотекатыгар Е.А.Борисовка анаммыт кинигэ быыстапкатын күн ахсын кэлэн көрүҥ, кинигэлэри уларсан ааҕыҥ диэн ыҥырабыт!