«Тыа хаһаайыстыбатын сайдыыта-олохпут тупсуута» Хадаар нэһилиэгэ.
Сэтинньи 22 күнүгэр Чурапчы оройуонун Эрилик – Эристиин аатынан колхуос, сопхуос Хадаардааҕы отделениетыгар өр сылларга биригэдьииринэн, управляющайынан үлэлээбит, Хадаар нэһилиэгин Бочуоттаах олохтооҕо, «Бочуот Знага» уордьан кавалера Николай Иннокентьевич Дьячковскай-Дьаарыс уола 100 сылыгар анаммыт «Тыа хаһаайыстыбатын сайдыыта-олохпут тупсуута» тэрээһин бэлиэтэннэ.
Тыа хаһаайыстыбатын күнүгэр анаммыт үөрүүлээх чааска хороҕор муостааҕы хойуннарар, үрүҥ илгэни үлүннэрэр, сыспай сиэллээҕи сиэллэрэр Хадаар нэһилиэгин дьону-сэргэтин «Хадаар нэһилиэгэ» тыа сирин түөлбэтин баһылыга Афанасий Степанов, «Чурапчы улууһа» МТ баһылыга Степан Саргыдаев, улуустааҕы тыа хаһаайыстыбатын салалтатын солбуйааччыта Константин Ильин, ЧГИФКиС ректора Иннокентий Готовцев эҕэрдэлээтилэр, наҕараадалары туттардылар. Ол курдук, “Чурапчы улууһун бочуоттаах бэтэрээнэ” ааты Петр Дьячковскай, Чурапчы улууһун “За добросовестный труд” бэлиэни Павел Игнатьев, тыа хаһаайыстыбатыгар киллэрсибит кылаатын иһин улуус баһылыгын өйдөбүнньүк бэлиэлээх махталынан Афанасий Андросов уо.д.а. наҕараадаланнылар,
Тыа хаһаайыстыбатын сайдыытыгар киллэрсибит кылааттарын, үтүө суобастаах үлэлэрин иһин «Хадаар нэһилиэгэ» тыа сирин түөлбэтин Бочуотунай грамоталарын, эҕэрдэ суруктарын, бэлиэлэрин, махтал суруктарын, анал ааттарын нэһилиэкпит туруу үлэһит дьонугар-сэргэтигэр туттардылар.
Сүөһүнү, сылгыны тутан олорор Герой ийэ Давыдова Е.Р. оҕолоругар «Тыа хаһаайыстыбатын сайдыыта-удьуор утумугар», «Эрэллээх үүт туттарааччы» Людмила Адамоваҕа, «Көмөлөөх үүт туттарааччы» Радомир Ксенофонтовка, «Туруу үлэһит» Елена Григорьеваҕа, «Кыһамньылаах сүөһү көрөөччү» Февронья Неустроеваҕа анал ааттары туттардылар.
Үбүлүөйдээх Н.И.Дьячковскай оҕолоро, сиэннэрэ бу күн аҕаларын үтүө аатын үйэтитэн, ахтан-санаан туран бэйэлэрин эҕэрдэлэрин, махтал тылларын Хадаар нэһилиэгин олохтоохторугар анаатылар. Саха төрүт дьарыгын тэнитэн тыа хаьаайыстыбата сайдарыгар үгүс кылааттарын киллэрэр, бэриниилээхтик үлэлии-хамсыы сылдьар, эдэр дьоҥҥо холобур буолар дьоммутугар «Саха төрүт дьарыгын тэнитээччи» А.В.Софронова дьиэ-кэргэнигэр, «Уйгуну-быйаҥы уһансар бастыҥ хаһаайыстыба» Иннокентий Ксенофонтовка, «Кэскиллээх хаһаайыстыба» Евгений Лукиҥҥа анал ааттары, 30 тыһыынчалаах сертификаттары туттардылар.
Тэрээһиҥҥэ С.Д.Флегонтов аатынан Хадаар орто агро оскуолатын «Идэһэ-2024» выставката киэҥ сэҥээриини ылла, Н.И.Дьячковскай оҕолоро, нэһилиэк култуурата тэрийбит «Тыа хаһаайыстыбата -оҕо хараҕынан» уруһуй выставката турда, «Бастыҥ биригэдьиир…» театрализованнай испиктээк көрдөрүлүннэ. Ону сэргэ түөлбэлэр бырааһынньыктааҕы фуршет остуолунан күндүлээтилэр, салҕыы «Бааттаах түгэн» розыгрыш ыытылынна.
«Тыа хаһаайыстыбата -оҕо хараҕынан» уруһуй куонкурус кыайыылаахтара:
Алын сүһүөх кыайыылаахтара:
1 миэстэ — Лукина Тамара 4 класс
2 миэстэ — Андросов Данил 2 класс
3 миэстэ — Мордускина Афелия 4 класс
Орто сүһүөх кыайыылаахтара:
1 миэстэ — Мордускина Амелия 5 класс
2 миэстэ — Никонов Айаал 8 класс
3 миэстэ — Анемподистова Марианна 7 класс
Үрдүкү сүһүөх кыайыылаахтара:
1 миэстэ — Николаева Иванна 9 класс
2 миэстэ — Листикова Марта 10 класс
3 миэстэ — Герасимов Владимир 10 класс
Бары кыттыбыт оҕолорбутугар туоһу суруктары, минньигэс бэлэхтэри туттардыбыт.
Дьячковскайдар аймах үлэни үрдүктүк туппут аҕаларын үйэтитиилэрэ, атыттарга холобур буолуон эрэ сөптөөх. Үлэһит дьон маннык чиэстэнэллэр, бочуоттаналлар диэн оҕолорбутугар, ыччаттарбытыгар өйү-санааны иҥэриигэ олугунан буола турдун. Тыа хаһаайыстыбатын сайыннарыыга үлэлиир убаастыыр, ытыктыыр биир дойдулаахтарбытын үрдүк наҕараадаларгытынан итиитик-истинник э5эрдэлиибит! Чэгиэн-чэбдик доруобуйаны, тус бэйэҕитигэр уонна чугас дьоҥҥутугар, дьиэ кэргэттэргитигэр ситиһиини, дьолу-соргуну!