«СЮЗАННА» үҥкүү тылынан литературнай дьүһүйүү
Аан дойдутааҕы үҥкүү күнүн, бүтүн Арассыыйатааҕы “Библионочь-2024” социальнай, культурнай акция чэрчилэринэн Хадаар нэһилиэгэр Борис Иванович Павлов-Кэм суруйуутунан «Сюзанна» пьесаттан быһа тардан үҥкүү тылынан литературнай дьүһүйүүнү көрдөрдүбүт. Нэһилиэкпитигэр үҥкүү күнэ уонна «Библионочь» тэрээһин сылын ахсын ыытыллар биир күүтүүлээх, араас сонун ис хоһоонноох, дьон сэргэ, улаханныын кыралыын көхтөөхтүк кыттар биир улахан тэрээһинэ буолар. Бу тэрээһин соруга соруга ааҕыыны көҕүлүүр, кэрэни кэрэхсиир сыаллаах бэйэбит толкуйдарбытын, үгэстэрбитин эдэр ыччакка тириэрдибит киһи диэн, суруллар истиили, санаабытын оҕолорбутугар хаалларбыт киһи диэн тэрилиннэ. Тэрээһиммит биир киһи холугар олус таһаарыылаахтык үлэлиир, туппут суолуттан туораабатах айар киһи, бэйиэт, кэпсээнньит, СӨ үтүөлээх суруналыыһа, Арассыыйа суруналыыстарын сойууһун чилиэнэ, «Көмүөл» кинигэ кыһатын тэрийээччитэ, бас билээччитэ, салайааччыта Борис Иванович Павлов-Кэм туһунан билиһиннэрииттэн саҕаланна.
Бу күн ааҕыыга, үҥкүүгэ бастыҥнарга Анал ааттары туттартаатыбыт. Ол курдук «Перспективный читатель» анал ааты С.Д.Флегонтов аатынан Хадаар орто оскуолатын 2-с кылааһын үөрэнээччитэ Элла Тарасоваҕа, «Любитель классики» анал ааты Мария Гаврильеваҕа, «Читающая семья» анал ааты Августина, Петр Тарасовтар дьиэ-кэргэҥҥэ туттардыбыт. Үҥкүү кэрэ эйгэтигэр «Дьоһун Мааны» анал аат Анна Мордускинаҕа, «Нарын Иэйии» анал аат Надежда Климоваҕа, «Сырдык Сыдьаайа» анал аат Лия Решетниковаҕа, «Кэскиллээх үҥкүүһүт» анал аат С.Д.Флегонтов аатынан Хадаар орто оскуолатын 11-с кылааһын үөрэнээччитэ Айтал Дьячковскайга туттарылынна.
Бу тэрээһиҥҥэ кыттыыны ылбыт, көмөлөспүт нэһилиэкпит дьонугар — сэргэтигэр барҕа махталбытын тиэрдэбит!
Хаартыскалары туора ыытан көр, сэҥээр.
