Улуу Кыайыы күнэ Хадаар нэһилиэгэр
Хадаар нэһилиэгэр өрөгөйдөөх Улуу Кыайыы 79-с сылын көрсөр араас хайысхалаах тэрээһиннэр ыытылыннылар.Төһө да сэлээлии хаамыыны боппуттарын иһин, кэриэстиир миитинэн солбуллан, араас ацияларга кыттыыны ылан бырааһынньыкпытын бэлиэтээтибит. Кыайыы күнэ диэн хас биирдии киһиэхэ саамай күүтүүлээх, сырдык, кэрэ бырааһынньыгынан буоларын бары билэбит. Хадаар нэһилиэгэр 3 хоту көһөрүллүү кыттыылааҕа уонна сэрии сылын оҕолоро олороллор. Ыам ыйын 8 күнүгэр нэһилиэк баһылыга Афанасий Степанов ытык-мааны кырдьаҕастарбытыгар, ону тэҥэ анал байыаннай дьайыыга сылдьар уонна хорсуннук охтубут уолаттарбыт дьиэ-кэргэттэригэр эҕэрдэ, махтал суруктары, бородуукта наборун оҥорон туттартаата. Аҕам саастаах, ытыктыыр кырдьаҕастарбыт төһө да дьиэҕэ олордоллор, нэһилиэкпит олоҕор, инники сайдыытыгар, кэнчээри ыччаттарга холобур буолар бастыҥ дьоммут буолаллар.
Нэһилиэк олохтоохторо ыам ыйын 6-9 күннэригэр дылы «Стена Памяти», «Окно Победы», «Бессмертный Полк», «Свеча Памяти» бүтүн Арассыйатааҕы акцияларга кыралыын улаханныын кыттыыны ыллылар.
Ыам ыйын 9 күнүгэр Чурапчы улууһугар ыытыллыбыт Кыайыы парадыгар Хадаар нэһилиэгин эр дьоно кыттыыны ыллылар. Быйыл парад киин уулуссанан сэлэлии хааман, киин болуосакка киирэн турда. Улуу Кыайыы парада мэлдьи буоларын курдук өрө көтөҕүллүүлээхтик, үрдүк тэрээһиннээхтик ааста.
Киэһэ өттүгэр нэһилиэкпитигэр С.Д.Флегонтов аатынан Хадаар орто оскуолата, биэс бойобуой уордьан кавалера Семен Дмитриевич Флегонтов пааматынньыгын иннигэр «Ким да умнуллубат, туох да умнуллубат» үөрүүлээх дьаһал ыытылынна. Эҕэрдэ тылы иитэр үлэҕэ дириэктэри солбуйааччы Лидия Ивановна Лукина эттэ. Оскуола үөрэнээччилэрэ пааматынньык иннигэр венок уурдулар, сэрии толоонугар охтубут буойуннар сырдык ааттарыгар сүгүрүйэн, биир мүнүүтэ сөҥүөрэн турдулар, кылаастарынан «Кыайыы ырыаларын» толордулар. Салҕыы Кыайыы пааматынньыгар тиийэн «Свеча Памяти» акцияҕа кыттан чүмэчилэри уматтылар.
Ытыктыыр дьоммут, күндү бэтэрээннэрбит, нэһилиэкпит олохтоохторо! Эһигини өссө төгүл Аҕа дойду сэриитигэр Кыайыыны ситиспиппит 79-с сылын көрсөр өрөгөйдөөх күнүнэн итиитик-истиҥник эҕэрдэлиибит. Баҕарабыт чэгиэн туругу, этэҥҥэ буолууну.