Самаан сайыны ыраастык көрсөбүт.
Ыам ыйа-ыраастаныы ыйа. Үгэс буолбут самаан сайыны көрсө Ньукуолун күн Хадаар нэһилиэгэр ыраастаныы күнэ биллэриллэн тэрилтэлэр истэрин-тастарын бөхтөн-сыыстан ыраастаан, кэрэ-бэлиэ сирдэринэн сылдьан ыһыллыбыты хомуйан үлэ күөстүү оргуйда. Субуотунньуктар нэһилиэги сомоҕолууллар, урукку кэми санатан өйөһүүнү, ыраас-сырдык буолууну торумнууллар.
«Мичил» уһуйаан коллектива ыһыахтыыр түһүлгэттэн саҕалаан илин Бэрэҕэ дылы күөл кытыытын бөҕүн хомуйан ыраастаатылар.
Тыа сирин сайдар киинин иһинэн үлэлиир тэрилтэлэр айан суолун кытыыларын, тохтобул, сынньанан ааһар ытык сирдэр тастарын хомуйдулар.
«Тускул» култуура уонна спорт киинин коллектива кулууп таһын, күөх зона охтубут маһын-отун эрбээн күүстээх үлэни көрсөн ыраастаатылар.
Кыра тэрилтэлэр холбоһон балыаһа, ветеринарнай учаастак тастарын, Ийэ скверын иһин-таһын хомуйдулар, сэргэхситтилэр.
Оскуола коллектива ыһыах түһүлгэтин, арҕаа Бэрэ күөл кытыытын бөҕүн-саҕын хомуйдулар, ыраастаан эрчимнээхтик үлэлээтилэр.
Ананаллыбыт сирдэр хомуллан, хаппыт мас эрбэнэн, тиэллэн, сыбаалкаҕа илдьэн тоҕулунна. Бу курдук сырылаччы сылаас күн, кэҕэ чоргуйар, чыычаах дьырылатар саҥатынан доҕуһуоллатан, буһа-хата күргүөмнээхтик үлэлээтибит. Төрөөбүт түөлбэбит сирин-уотун ыраастаан, чэбэрдик дьаһанан, тулалыыр эйгэҕэ харыстабыллаахтык сыһыаннаһан олорорбут кэнчээри ыччаппытыгар холобур буоллун. Субуотунньукка кыттыбыт бар дьоммутугар улахан махталбытын биллэрэбит.