Хадаар нэһилиэгэр КУЛТУУРА-СПОРТ дьоро түһүлгэтэ.
Култуура – норуот сайдыытыгар уһулуччу суолталаах, норуоту сомоҕолуур, түмэр күүс, сырдыкка угуйар, кэрэни тарҕатар эйгэ.
Муус устар 17 күнүгэр Хадаар нэһилиэгэр Арассыыйа Норуоттарын сомоҕолоһууларын, Саха сиригэр Култуура, Чурапчы улууһугар Оҥорон таһаарыы сылларыгар, Аан дойдуга Култуура күнүгэр анаммыт ОДЬУЛУУН, ДИРИҤ, ХАДААР, ХАЙАХСЫТ, ЧАКЫР нэһилиэктэрин култууратын байыастарын икки ардыларыгар култуура-спорт дьоро түһүлгэтэ ыытылынна.
Кэлбит ыалдьыттары култуура үлэһиттэрэ сылаас алаадьынан үөрэ-көтө көрүстүлэр. Тэрээһин нэһилиэктэр парадтаан хааман киириилэринэн саҕаланна. Хамаандалар бары күрэххэ бэлэмнэрэ тута харахха быраҕыллар. «Тускул» култуура уонна спорт киинин директора Иннокентий Дьячковскай кэлбит ыалдьыттарга эҕэрдэ тылын эттэ, «САЙДЫЫНА» үҥкүү бөлөҕө «АЛГЫС» үҥкүүнэн уруйдаата. (Сал. И.Адамова)
Салҕыы нэһилиэктэр 5 хамаандаҕа арахсан, 6 көрүҥҥэ илин-кэлин түһүстүлэр. Бадминтон, дуобат, саахымат, дартс, хорнхол, салгын саанан ытыы. ХатыҺыылаах, улахан эрийсиилээх көрсүһүү түмүгэ, киирсиилэр маннык буоллулар:
Бадминтон күрэҕэр I миэстэ «От күөҕэ», II миэстэ «Араҥас», III миэстэ «Халлаан күөҕэ» хамаандалара ылан мэтээлинэн, дипломунан бэлиэтэннилэр. Бу күрэххэ «БАСТЫҤ ООННЬООЧЧУ» анал ааты Алена Поисеева (Хайахсыт), эр дьоҥҥо Айтал Сидоров (Дириҥ) ыланнар бириис туттулар.
Өйү-мэйиини сайыннарар, толкуйу эрчийэр дуобат уонна саахымат көрүҥэр хамаандалартан биирдии кэрэ аҥар, биирдии эр дьон кииристилэр. Түмүккэ саахымакка I миэстэ Захар Лукин (Хадаар), II миэстэ Василий Авксентьев (Одьулуун), III миэстэ Сардана Макарова (Чакыр) ыллылар.
Дуобат тумара хонуутугар I миэстэ Николай Кириллин (Дириҥ), II миэстэ Парасковья Орлова (Хадаар), III миэстэ Галина Филиппова (Дириҥ) ыланнар хамаандаларыгар эбии очколары аҕаллылар. «БАСТЫҤ ООННЬООЧЧУ» аат анал бириистэрин хотторуута суох киирсибит Захар Лукин (Хадаар) уонна Николай Кириллин (Дириҥ) туттулар.
Дартс биһиги нэһилиэкпитигэр сайдан күүһүн ылан эрэр көрүҥүнэн буолар. Бу көрүҥҥэ I миэстэ «От күөх , II миэстэ «Халлаан күөх», III миэстэ «Маҥан» хамаандалара ылан үөрдүлэр-көттүлэр.
Корнхол диэн интэриэһинэй, умсугутуулаах саҥа спорт көрүҥүн бары да сөбүлээтибит. Хамаандалартан биирдии кэрэ аҥар уонна эр киһи кытыннылар. Кыайыылаахтарынан I миэстэ «Араҥас» , II миэстэ «Кыһыл», III миэстэ «От күөх» хамаандалара ылан кыайыы үөрүүтүн биллилэр. «БАСТЫҤ ООННЬООЧЧУ» аат анал бириистэрин саамай элбэх очкону хамаандаларыгар аҕалбыт Анна (Чакыр), Кирилл Пестерев (Дириҥ) ыллылар.
Түмүктүүр көрүҥүнэн салгын саанан ытыы, кыраҕы харахтаах ытааччылар күөн көрүстүлэр. Хамаандалартан биир кэрэ аҥар, икки эр дьон кытыннылар. Түмүккэ I миэстэ «Халлаан күөх» хамаанда 63 очко, II миэстэ «От күөх» хамаанда 40 очко, III миэстэ «Кыһыл» хамаанда 36 очко ыланнар наҕараадаланнылар.»БАСТЫҤ ООННЬООЧЧУ» аат анал бириистэрин, бэргэн ытааччылар Сайаана Дьяконова (Дирин), Владислав Поисеев (Хайахсыт) ыллылар.
Бу курдук олус сытыы, тыҥааһыннаах киирсиилэр уопсай түмүктэринэн I миэстэ 13 очколаах «От күөх» хамаанда, II миэстэ 16 очколаах «Халлаан күөх» хамаанда , III миэстэ 19 очколаах «Араҥас» хамаандалара ылан кыайыы өрөгөйүн биллилэр. Хас биирдии хамаанда кыайыыга эрэл санаалаах, дьаныардаахтык киирсибиттэрэ күрэхтэһиини сытыырхатта.
Кэлбит ыалдьыттарбытын Хадаар нэһилиэгин култууратын үлэһиттэрэ минньигэс астаах фуршетынан күндүлээтибит, остуол тула олорон ирэ-хоро кэпсэтэн, бу тэрээһин салҕанан, аны саас Дириҥ нэһилиэгэр ыытыллара былааннанна. Чурапчы улууһун соҕуруу нэһилиэктэрин култууратын байыастара эһиил Дириҥҥэ көрсөргө бэлэмнэр, салҕыы нэһилиэктэр холбоһуктаах «Кэрэ эйгэ долгуна» кэнсиэринэн бу тэрээһин түмүктэннэ. Бары махтанан, үтүө тылларын тэрийээчччилэргэ анаан, үөрэн-көтөн тарҕастылар.
