Хадаар-Одьулуун хамаандаларын икки ардыларыгар Аан дойду дьахталларын күнүн чэрчитинэн ыытыллыбыт Бадминтон күрэҕэ.
Кулун тутар 10 күнүгэр Хадаар нэһилиэгэр Аан дойду дьахталларын күнүн чэрчитинэн Хадаар-Одьулуун хамаандаларын икки ардыларыгар бадминтон күрэҕэ ыытылынна. Хадаартан «Мичил», «Черная пантера», «Эрэл» хамаандалара, Одьулуунтан «Зеленый рай», «Сулус», «Леди» хамаандалара илин-кэлин түсүһэн бастыыр иһин оонньоотулар.
Түмүккэ I миэстэни Одьулуунтан «Зеленый рай», II миэстэни «Сулус», III миэстэни Хадаартан «Мичил» хамаандалара ыллылар.
Кыайбыт хамаандаларга «Тускул» култуура уонна спорт киинин директора Николай Дьячковскай мэтээллэри, грамоталары, бэлэхтэри, туоһу суруктары туттарда. Одьулуун нэһилиэгин бадминтоҥҥа бөлөҕүн салайааччыта Анна Ефимова Хадаар нэһилиэгин бастыҥ бадминтоҥҥа оонньооччуларыгар Татьяна Дьячковскаяҕа «БАСТЫҤ ТЕХНИКАЛААХ», Зарина Лукинаҕа «БЭРГЭН ОХСООЧЧУ» анал ааттары туттарда.
Хадаар-Одьулуун салҕыы дьарык ситимин быспакка дьулуурдаахтык, ситимнээхтик салҕыы доҕордоһуу сыһыаны олохтуурга махтал суруктары туттардылар.
Бу күрэххэ көннөрү күрэхтэһэн эрэ буолбакка, Одьулууннартан маастар-кылаас ыллыбыт дии саныыбыт. Спорт бу көрүҥэ кэлиҥҥи кэмҥэ Хадаарга олус элбэх кэрэ аҥары түмэрин сэргиибит. Инникитин ситиммитин быспакка, бииргэ алтыһан, бэйэ-бэйэбититтэн элбэххэ үөрэнэн, дьарыктанан өссө да кыттар баҕа баар. Бары кыттыбыт кэрэ аҥардарга, тэрийээччилэргэ Анна Ефимоваҕа, Лена Карповаҕа, Лена Ноговицынаҕа, Николай Дьячковскайга махталбытын тиэрдэбит!
