«Дойдубут эмтээх үүнээйилэрэ» маастар-кылаас.
Бу курдук ааттаммыт маастар-кылаас олунньу 6 күнүгэр нэһилиэк библиотекатыгар ыытылынна. Маастар-кылааһы ыаллыы сытар Дириҥ нэһилиэгин библиотекатын сэбиэдиссэйэ, Чурапчы улууһун «Норуот маастара» Марианна Толстоухова иилээн ыытта. Нэһилиэкпит дьоно айылҕалыын алтыһар буолан ото-маһа эмтээҕин, туһалааҕын өйдөөн, доруобуйаларын бөҕөргөтөргө, тупсарарга анаммыт тэрээһиҥҥэ кыттыыны ыллылар.
Удьуор отоһуттары салҕааччы Марианна Прокопьевна бэйэтэ хомуйар, оҥорор, туһанар эмтээх үүнээйилэр тустарынан сиһилии кэпсээтэ. Оттору хаһан, хайдах хомуйары, хатарары, хаһаанары, сөпкө туттары, настойкалары хайдах оҥоруу туһунан тус уопутуттан үллэһиннэ, туһалаах сүбэлэри биэрдэ.
Сахабыт сиригэр тахсыбыт эмтээх үүнээйилэр тустарынан кинигэ быыстапката турда, ону тэҥэ Марианна Прокопьевна ийэтэ Клара Токумова, убайа Петр Токумов таһааттарбыт ийэ айылҕа баайын-дуолун, күөх эйгэ күндү бэлэҕин таба туһанарга үөрэтэр, чөл олоххо сирдиир «ТӨРӨӨБҮТ ДОЙДУБУТ ЭМТЭЭХ ҮҮНЭЭЙИЛЭРЭ» кинигэлэрэ, эмтээх оттор, настойкалар атыыланнылар. Маастар — кылааска сылдьыбыт дьон олус биһирээн, астынан, тустарыгар туһанан тарҕастылар.
