Тохсунньу ыйы түмүктүүр тэрээһиннэриттэн сонуннар.
Тохсунньу 27-28 күннэригэр нэһилиэк, оскуола библиотекаларыгар Аҕа дойду сэриитигэр Ленинград (Санкт-Петербург) өстөөх төгүрүктээһиниттэн (блокада) толору босхоломмут күнүн көрсө оҕолорго «ЛЕНИНГРАД БЛОКАДАТЫГАР АНАММЫТ ХОҺООН КҮНЭ» тэрээһини ыыттыбыт. Икки күн оҕолор Ленинград олохтоохторо тылынан да кыайан кэпсэммэт тулууру көрдөрөн, өстөөх сөмөлүөттэрин буомбалааhыннарын, артиллериятын уотун аннынан куораттарын көмүскээн, кыайыыны аҕалбыттарын, ол туһунан суруллубут хоһооннору ааҕан, көрөн-истэн, тургутукка кыттан тарҕастылар. 5 кылаастарга Андросова Мила, Лукина Тамара, Мордускина Айсаана элбэх боппуруоска сөптөөх эппиэти биэрдилэр, сэмэй бириистэри туттулар.
Тохсунньу 29 күнүгэр И.Н.Винокуров аатынан «Айылгы» норуот айымньытын дьиэтигэр Саха сиригэр Култуура, Чурапчы улууһугар олохтоох бэйэ оҥорон таһаарыытын сылларын чэрчитинэн кыл-сиэл оҥоһук сайдыытыгар туһуламмыт «СӨРҮӨ-ӨРҮҮ» научнай практическай конференция буолан ааста. Тэрээһиҥҥэ биһиги нэһилиэктэн талба талааннаах маастарбыт, үтүөнү, кэрэни, үйэлээҕи тарҕатааччы Ирина Филиппова кыттыыны ылла. Конференция чэрчитинэн дакылааттары истэн баран Ирина Николаевна маастар-кылааска кытынна. Сөрүө өрүүтүн, оҥоруутун, материалын бэлэмнээһинин туһунан бэйэтин уопутуттан кэпсээтэ. көрдөрдө.
Кэрэхсэбиллээҕэ диэн конференция быыстапкатыгар биир дойдулаахтарбыт, удьуор утум сөрүөһүттэр Евдокия Пинигина, Мария Рехлясова, Варвара Кривошапкина оҥоһуктара дьон-норуот көрүүтүгэр турдулар. Араас эгэлгэ, сиэдэрэй оҥоһуктар быыстапкаларын И.Н.Винокуров аатынан «Айылгы» норуот айымньытын дьиэтигэр олунньу ый 25 күнүгэр дылы сэргии, кэрэхсии көрүөххүтүн сөп.
Тохсунньу 30 күнүгэр Саха сиригэр Култуура сылыгар туһуламмыт библиотека иһинэн үлэлиир «ЭКСКЛЮЗИВ» коллекционердар түмсүүлэрин кэрэ аҥардара мустан, сүбэ-сорук, үлэ былаанын ылынан, бу сылга анаммыт «Созвездие талантов Якутии» интерактивнай ооньууга кыттан, Култуура уонна Сомоҕолоһуу сылыгар дьоһуннаахтык үлэлииргэ-хамсыырга сүбэлэстибит.
Тохсунньу 30 күнүгэр «Сырдаа» хамсааһын чэрчитинэн, биһиги ытык нэһилиэкпит тыыныгар уһуйуллан улааппыт кыыспыт, *Айылҕалаах Айхаана- Рада Ефимова*, Аар айылҕаттан, үтүө өбүгэлэриттэн бэриллибит аналынан, долгуйан туран, нэһилиэгин дьонун кытта истиҥ алтыһыы киэһэтин оҥордо.
«Дьоммут-сэргэбит итэҕэллэрин илдьэ сылдьар буоланнар сэргээн кэлэн көхтөөх кыттыыны ыллылар. Сэһэргэһии сиэр-туом тула, ону таһынан киһи бэйэтин сааһыланан олоҕун тупсарыытын, хайдах, тугунан бэйэни ыраастаныахха сөбүн туһунан билиилэрин хаҥаттылар. Сүрүнэ диэн Ытык дойдубут үтүө иччитэ дьонугар-сэргэтигэр тиэрдэр этитиитин иһиттилэр. Тустаах ыйытыктарыгар хоруйдары ыллылар. Тапталлаах дойдубут тыына, эйгэтэ тупсарын туһугар, олох-дьаһах этэҥҥэ салаллан иһэрин туһугар бары биир сомоҕо буолан үүнэн-сайдан, үлэлээн-хамнаан, үтүөнү үксэтэ туруоҕуҥ! Дьоммутугар-сэргэбитигэр махталбыт маанытын аныыбыт.»-диэн Марфа Артемьева-Алтаана Сыдьаай санаатын үллэстэр.
