Тохсунньу ый сонуннара
«ЭКСКЛЮЗИВ» коллекционердар түмсүүлэрин тутаах мунньааччыта Ирина Филиппова өрөспүүбүлүкэтээҕи «БЫЛЫРГЫ МАЛ ЛААППЫТА» бөлөх иһинэн ыытыллыбыт көрүүгэ 10 бастыҥнар истэригэр киирэн «2025 сыл — БАСТЫҤ КОЛЛЕКЦИОНЕРА» ааты ылары ситистэ. Ирина Николаевна нэһилиэгин, улууһун эрэ иһинэн муҥурдаммакка дьарыгын бу курдук киэҥ эйгэҕэ таһааран, билиһиннэрэрэ, куонкурустарга кыттара биһиэхэ холобур, хайҕаллаах суол.
Тохсунньу 20 күнүгэр Хадаар нэһилиэгэр улуус баһылыгын отчуоттуур мунньаҕа буолан ааста. Сүрүн дакылааты «Чурапчы улууһа» МТ баһылыга Степан Саргыдаев оҥордо. Хадаардар уопсай үлэни-хамнаһы сөптөөҕүнэн сыаналаатылар. Степан Анатольевичка Хадаар нэһилиэгин Уорҕа учаастагын баай ис хоһоонноох, ааспыт олоҕун кэрэһэлиир, билиҥҥи кэмин кэпсиир кэрэ кэрчиктэринэн сырдатыллыбыт, дьоһуннаах дьонун-сэргэтин туһунан кэпсиир, сырдатар «ТӨРҮТ ДОЙДУБУТ УОРҔА» кинигэни «Хадаар нэһилиэгэ» тыа сирин түөлбэтин дьаһалтатын, депутаттарын сэбиэтин, дьонун-сэргэтин аатыттан бэлэх ууннубут.
Тохсунньу 21 күнүгэр 3-4 кылаас оҕолоругар «ДЕТСКИЕ ПИСАТЕЛИ И ИХ ПРОИЗВЕДЕНИЯ» библиотечнай уруок ааста. Уруогу нэһилиэк библиотекатыгар практикатын ааһа сылдьар, Арктикатааҕы култуура уонна ускуустуба судаарыстыбаннай университетын 2-с куурсун студенката Олеся Орлова ыытта. Оҕолорго ааҕыыны тарҕатыыга, суруйааччылар айымньыларын тиэрдэргэ маннык дьаһаллар төһүү күүс буолуохтара диэн эрэнэбит. Уруок кэннэ билиилэрин чиҥэтэн таабырыннарынан биктэриинэ ыытылынна. Григорьева Мичийэ, Борисов Замир, Лукина Мила бастыҥ билиилээх аатын ылан минньигэс бэлэҕи туттулар.
Тохсунньу 21 күнүгэр А.К.Софронов аатынан спорткомплекска Чысхаан уонна Хаарчаана бирииһигэр Чурапчы улууһун култууратын үлэһиттэрин спартакиадата ыытылынна. Барыта успуорт 10 көрүҥэр биирдиилээн, хамаанданан бастыыр иһин илин-кэлин түһүстүлэр. Хадаар нэһилиэгин култууратын байыастара бу күрэххэ кыттыыны ылан, ситиһии көтөллөөх кэллилэр. Ол курдук, дуобакка Парасковья Орлова кыттыыны ылла, саахымакка Иннокентий Дьячковскай- I миэстэни, дартска Захар Лукин — III миэстэни, сахаваболга хамаанданан оонньууга Владислав Романов I миэстэни, Дмитрий Мордускин, Николай Дьячковскай III миэстэн ылары ситистилэр. Салҕыы Чурапчы улууһун тэрилтэлэрин спартакиадатыгар кыттарга бэлэмнэр.
Тохсунньу 22 күнүгэр Саха сиригэр Култуура сылын чэрчитинэн орто, улахан кылаас оҕолоругар «КУЗНИЦА ТВОРЧЕСКИХ КАДРОВ» профориентационнай чаас ыытылынна. Олеся Вячеславовна Арктикатааҕы култуура уонна ускуустуба судаарыстыбаннай университетын үөрэх салааларын билиһиннэрдэ, бэйэтэ үөрэнэ сылдьар библиотечнай салаатын туһунан кэпсээтэ. Оҕолор сэргээн иһиттилэр, кэпсэтиигэ кыттыһан боппуруостары ыйыттылар. Бу көрсүһүү олус интэриэһинэй, туһалаах буолла, иннкитин идэни сөпкө таларга төһүү күүс буолуо диэн эрэнэбит. Түмүгэр идэлэр тустарынан оонньууга кыттыстылар.
