«Төрүт дьарык олох төрдө» Хадаар нэһилиэгэр үтүө үгэстээх тыа хаһаайыстыбатын дьоро күнэ.
Үлэһит үтүө дьоннордоох Хадаар нэһилиэгэ дьонун-сэргэтин үгэскэ кубулуйбут бүтүн республика үрдүнэн ыытыллар тыа хаһаайыстыбатын үлэһиттэрин дьоро күнүгэр түмтэ. Хадаар нэһилиэгэ тыа хаһаайыстыбатын салаатыгар, тыа сирэ сайдарын туһугар туруулаһан үлэлиир дьоно, хаһаайыстыбалара бу бырааһынньыкпытын үлэҕэ кэккэ ситиһиилэрдээх, инникигэ эрэллээх көрүстүбүт. Ханнык да ыарахаттартан толлубакка, сүөһү иитиитигэр, тыа хаһаайыстыбатын бары салаатыгар таһаарыылаахтык үлэлиир-хамныыр дьоммут нэһилиэк, улуус, өрөспүүбүлүкэ сайдыытыгар сүдү кылааттарын киллэрсэллэр.
«Төрүт дьарык олох төрдө» тыа хаһаайыстыбатын үөрүүлээх чааһыгар «Хадаар нэһилиэгэ» тыа сирин түөлбэтин баһылыга Афанасий Степанов, «Чурапчы улууһа (оройуона)» МТ депутаттарын Сэбиэтин бэрэссэдээтэлэ Яков Оконешников, шефтээх тэрилтэлэрбит- Чурапчытааҕы саастарын ситэ илик оҕолору чөлүгэр түһэрэр киин салайааччытын солбуйааччыта Петр Птицын, Чурапчытааҕы судаарыстыбаннай физическай култуура уонна успуорт институтун ректора, улуус мунньаҕын депутата Иннокентий Готовцев, «Хадаар-Чурапчы» түмсүү салайааччыта Иван Лукин кыттыыны ылан эҕэрдэ тылларын нэһилиэктэрин, Чурапчы улууһун сайдыытыгар киллэрбит кылааттарын иһин, өр сыл үтүө суобастаахтык үлэлии сылдьар дьоммутугар, үбүлүөйдээхтэргэ өйдөбүнньүк бэлиэлээх махтал суруктары, Бочуотунай грамоталары үөрүүлээх быһыыга-майгыга туттардылар.
Бу күн биир үөрүүлээх бэлиэ түгэн буолан ааста. Хадаар нэһилиэгин Ытык киһитэ, үлэ, тыыл, тыа хаһаайыстыбатын бэтэрээнэ, Хоту көһөрүллүү кыттыылааҕа, Хадаар нэһилиэгин Бочуоттаах олохтооҕо, СӨ Ытык кырдьаҕаһа, СӨ Ытык аҕата Дмитрий Константинович Лукин үбүлүөйдээх 90 сааһынан эҕэрдэлээтилэр. СӨ бэтэрээннэрин Сэбиэтин сайдыытыгар киллэрсибит кылаатын иһин Бочуотунай грамотанан, Чурапчы улууһун сайдыытыгар киллэрбит кылаатын иһин «Чурапчы улууһа» МТ эҕэрдэ суругунан, өр сыллаах үтүө суобастаах үлэтин, тыа хаһаайыстыбатын сайдыытыгар киллэрсибит кылаатын иһин «За вклад в развитие сельского хозяйства Чурапчинского улуса» бэлиэнэн, төрөөбүт түөлбэтэ нэһилиэгин сайдыытыгар сүҥкэн кылаатын иһин «ЫТЫК СААС» бэлиэнэн, 50 тыһ.солк. сэртэпикээтинэн, итини сэргэ иһирэх тылларын, бэлэхтэрин шефтээх тэрилтэлэрбит анаатылар. Дмитрий Константинович 90 сааһын сүһүөҕүн үрдүгэр, оҕолорун, сиэннэрин, хос сиэннэрин сылаас, истиҥ сыһыаннарыгар уйдаран көрсөр. Кини билигин даҕаны байанайдаах булчут, нэһилиэгин дьонун минньигэс балыгынан күндүлүүр, киэн туттар ытык киһибит буолар.
Бу күн шефтээх тэрилтэлэрбит эҕэрдэ нүөмэрдэрин, И.И.Кандинскай аатынан «Айыллаан» култуура киинин талба талааннаах байыастарын «АЙ-ЫЛЛАА» ылбаҕай ырыалардаах, кынаттаах үҥкүүлэрдээх эҕэрдэ кэнсиэрин дуоһуйа, астына көрдүбүт.
Кэнсиэр кэннэ нэһилиэкпит «Сардаҥа» (сал.Л.Лукина), «Эрэл» (сал.З.Теренкова), «Кэскил» (сал.З.Лукина) түөлбэлэрин бырааһынньыктааҕы минньигэс астаах сандалыларын тула ирэ-хоро кэпсэтэн, ас арааһын амсайан ыллыбыт. Сылын ахсын бырааһынньык остуолугар саҥаттан саҥа бүлүүдэни бэлэмнээн түөлбэлэр дьону-сэргэни күндүлүүллэр. «БААТТААХ ТҮГЭН-2025» сүүйүүлээх оонньууга тарбахтарыгар талааннаахтар «илии тутуурдаах, өттүк харалаах» үөрэн-көтөн тарҕастылар.
Тыа хаһаайыстыбата чэчирии сайыннын! Сыралаах үлэҕитин сыаналыыбыт, барҕа махталбытын биллэрэбит!