Сэттиэлэ солуннара
Нэһилиэк тыа сирин сайдар киинигэр «Боевые Шелкопряды» хамсааһын волонтердара СВО-ҕа көмөлөрүн тиһигин быспакка харысхал сеткалары өрүүнү салҕыыллар. Сотору кэминэн алгыс тыллаах сахалыы харысхаллары оҥорон саҕалаары, материалын күүтэбит. Хамсааһыҥҥа кыттыыны ылар далбар хотуттарга махтал тылларын этэбит.
СЭТИННЬИ 25 КҮНҮГЭР «ТУСКУЛ» култуура уонна спорт киинигэр «ЫЛЛЫЫР ЫЧЧАТ» уонна «УРАН» ырыа куттаах эдэр ыччат ансаамбыллара ону тэҥэ чаҕылхай солистара Егор Захаров, Айталина Сивцева, Сандаара Решетникова, Ева Попова уо.да. сэргэх кэнсиэри бэлэхтээтилэр. Кэнсиэртэн киирбит үп Мария Собакина онкологическай ыарыыттан эмтэнэригэр ананна.
Бу күн нэһилиэк олохтоохторо, «Мичил» уһуйаан үлэһиттэрэ, «Кэрэ Ситим» дьахтар түмсүүтэ, Чурапчытааҕы «Маарыкчаан» ПО ас-үөл, атыы-тутуу дьаарбаҥкатын тэрийдилэр.
Уопсайа «Мичил» уһуйаан үлэһиттэрэ 9410 солк. харчыны, «Кэрэ Ситим» дьахтар түмсүүтэ 7420 солк. харчыны, Чурапчытааҕы «Маарыкчаан» ПО 4080 солк. харчыны туттардылар. Аһымал кэнсиэртэн уопсайа 29.200 солк.киирэн, барыта холбоон 51 тыһ.тахса үбү Мария Васильевна эмтэнэ барарыгар туттардыбыт, этэҥҥэ эмтэнэн, доруобуйата тупсарыгар баҕара хаалабыт. Бу тэрээһиҥҥэ кыттыспыт Айыы санаалаах, аһыныгас нэһилиэкпит дьонугар-сэргэтигэр бэйэҕит кылааккытын килэрсибиккитигэр махтанабыт.
СЭТИННЬИ 25 КҮНҮГЭР өрөгөйдөөх Улуу Кыайыы 80 сылынан улуус дьаһалтатын, А.А.Саввин аатынан Чурапчытааҕы история уонна этнография, И.М.Павлов аатынан Чурапчытааҕы «Бойобуой Албан аат» түмэлин үлэһиттэрин көҕүлээһиннэринэн «Албан ааттара өлбөөдүйбэт!» диэн нэһилиэктэр быыстапкаларын көрүүгэ Халыҥ Хадаар нэһилиэгин Кыайыыны уһансыбыт биир дойдулаахтарын хорсун бойобуой суолларын үйэтитэр «Албан ааттара өлбөөдүйбэт» быыстапка аһылынна.
Хадаар нэһилиэгэ баай историялаах, үтүө үгэстэрдээх дойду… Киһи билиитэ-көрүүтэ кэҥээн истэҕин аайы, олорбут олоҕун суоллара уһаатаҕына-хантан хааннаахпыт, дойдум туох сурахтааҕай, туох дьоннооҕой, кимнээх төрөөн-олорон ааспыттарай диэн өйдөөн-санаан ылаҕын. Аҕа дойду Улуу сэриитигэр Кыайыы өрөгөйө аҕа көлүөнэ дьоммут хорсун быһыыларынан, эр санааларынан, бэйэни харыстаммат күүстээх үлэнэн ситиһиллибитэ. Уоттаах сэрииттэн тыыннаах эргиллибит, кыргыһыы толоонугар дьоруойдуу охтубут эр санаалаах буойуннар, тыылга, үлэ фронугар Кыайыы туһугар күүстээх үлэҕэ туруммут дьоммут-сэргэбит, оҕо-дьахтар хорсун быһыыларын үйэлэргэ умнуо суохтаахпыт, ахтан-санаан ылар ытык иэспит буолар.
Хадаар нэһилиэгин Аҕа дойду сэриитин кыттыылаахтарын хорсун суолларын сырдатар, Ийэ дойдуну көмүскээн араас кэмнэрдээҕи бойобуой дьайыыларга кыттыбыт биир дойдулаахтарбыт тустарынан кэпсиир долгутуулаах уонна үөрүүлээх күммүт аалай лиэнтэтин «Чурапчы улууһа (оройуона)» МТ дьаһалтатын баһылыга Степан Саргыдаев, «Хадаар нэһилиэгэ» тыа сирин түөлбэтин баһылыга Афанасий Степанов, Чурапчытааҕы физическэй култуура уонна спорт институтун ректора, улуус мунньаҕын депутата Иннокентий Готовцев үөрүүлээхтик быстылар.
Эҕэрдэ, махтал тыллар этилиннилэр, Кыайыы 80 сылыгар анаммыт, киэн туттар бэтэрээннэрбитин кэпсиир видео матырыйааллар көрдөрүлүннүлэр. «Албан ааттара өлбөөдүйбэт» быыстапканы биэс бойобуой уордьан кавалера С.Д.Флегонтов аатынан Хадаар орто оскуолатын түмэлин салайааччыта Елена Семеновна Харитонова сырдатта. Бу быыстапка улуус киинигэр биир нэдиэлэ дьон көрүүтүгэр И.М.Павлов аатынан «Бойобуой Албан аат» түмэлигэр туруоҕа. Күндү биир дойдулаахтарбыт быыстапканы көрөргүтүгэр ыҥырабыт.
