Улуу ОЛОҤХО уруйданнаҕа буоллун!
Олоҥхо күнүн көрсө Хадаар нэһилиэгэр төрүт үгэспитин илдьэ сылдьарга, үйэтитиигэ үлэлэһэр сыаллаах тэрээһиннэр ыытылыннылар. Сэтинньи 25 күнүгэр тыа сирин модельнай библиотекатыгар Өрөспүүбүлүкэтээҕи «ОЛОҤХО ДЬЫКТААНА-2025» аахсыйаҕа кыттыыны ыллыбыт. Дьыктаан олоҥхо тылын — өһүн иҥэриниигэ, тылын билиини чиҥэтиигэ, олоҥхо туһунан билиини кэҥэтиигэ, төрөөбүт тылынан таба суруйар таһымы үрдэтиигэ, сахалыы таба суруйуу үөрүйэҕин сайыннарыыга сыалланан-соруктанан нэһилиэнньэ киэҥ араҥатыгар ананна.
Быйылгы дьыктааҥҥа И.И. Бурнашев-Тоҥ Суорун «СЫЛГЫ УОЛА ДЫЫРАЙ БУХАТЫЫР» олоҥхоттон «Сир ийэ дойду айыллыыта» түһүмэхтэн быһа тардыыны суруйдулар. Түмүккэ анал ааттары «Бастыҥтан бастыҥ суруксут» Раиса Лукина, «Бастыҥ суруксут» Вера Баишева, «Үчүгэй суруксут» Анна Андросова ыллылар.
Бу күн Туймаада дьоллоох туонатыгар Былатыан Ойуунускай аатынан Саха академическай тыйаатырыгар ОЛОҤХО киһи-аймах тылынан уонна өйүнэн айбыт култуурунай нэһилиэстибэтинэн билиниллибитэ 20 сыллаах үөрүүлээх тэрээһинин түһүлгэтэ буолан ааста. Төрүт үгэспитин илдьэ сылдьааччыларга, үйэтитиигэ үлэлэһэр, ыччаты сайыннарыыга, уһуйууга кылааттарын иһин — бириэмийэлэри туттарыы сиэрэ-туома буолла. Ил Дархан иһинэн үлэлиир «Олоҥхо» национальнай кэмитиэтин «БАСТЫҤ ОЛОҤХОҔО УҺУЙААЧЧЫ» анал бириэмийэтин биир дойдулаахтарбыт Хатас нэһилиэгин «Кэрэчээнэ» уһуйаан төрүт култуураҕа уһуйааччыта Вера Никитична Старкова уонна Нам улууһун, Партизан нэһилиэгин «Кустук» уһуйаанын иитээччитэ Саргылана Ивановна Мордосова туттулар.
Оҕолору олоҥхо нөҥүө тобуллаҕас толкуйдаах, уус-уран хомоҕой тыллаах, сахалыы сиэрдээх буола улааталларыгар, олоҥхо эйгэтэ кэҥээн иһиитигэр айымньылаах, сыралаах үлэҕит сыаналаммытынан Вера Никитичнаҕа, Саргылана Ивановнаҕа биир дойдулаахтаргыт истиҥ эҕэрдэбитин, махталбытын биллэрэбит. Сырдыкка сирдиир үлэҕит-хамнаскыт салҕана, айылла туруохтун.
Сэтинньи 26 күнүгэр Олоҥхо күнүгэр анаммыт «Фольклор эйгэтин тиһигэ» тэрээһин буолан ааста.
Бу күн биир дойдулаахпыт, олоҥхоһут, алгысчыт, Чакыр нэһилиэгин Бочуоттаах олохтооҕо Николай Никитич Григорьев ыалдьыттаата. Кини саха уһулуччулаах суруйааччыта Эрилик Эристиин сурукка киллэрбит «БУУРА ДОХСУН» олоҥхотуттан быһа тардан толордо. Саала иһиттэн сотору, сотору «Ноо!» диэн сэҥээрии тыллар иһилиннилэр. Өбүгэлэрбит саҕаттан кэлбит олоҥхо тылын, тохтор тойугун илэ истэн дуоһуйдубут, астынныбыт.
Тэрээһиҥҥэ нэһилиэкпит олоҥхону сэҥээрээччилэрэ, төрүт култуура кэрэ эйгэтин бэлэхтиир талба талааннара кыттыыны ыллылар. Бу күн «ОЛОҤХО ДЬЫКТААНА-2025» тэрээһин түмүгэ тахсан кыттааччыларбытыгар Добун, туоһу суруктары туттардыбыт.
Ханнык баҕар олоҥхо оһуохайынан түмүктэнэринии, илии илииттэн ылсан күн үҥкүүтүн тула эргийдибит. Бары тэрээһиннэргэ актыыбынай кыттыыны ылбыт дьоммутугар-сэргэбитигэр махтанабыт!