Ытык Бахсы сиригэр Сомоҕолоһуу күнэ
Сомоҕолоһуу диэн биир сыаллаах, биир санаалаах буолууну ааттыыллар. Сэтинньи 4 күнүгэр Норуот Сомоҕолоһуутун күнүн көрсө, Кыайыы 80 сылыгар анаммыт ыалдьытымсах Ытык Бахсы сиригэр кэрэни кэрэхсии көрөр нэһилиэкпит дьикти дьарыктаах «ЭКСКЛЮЗИВ» коллекционердарын түмсүүтэ тэрээһиҥҥэ кыттыыны ылан кэллилэр.
Бахсытааҕы Т.П.Местников аатынан «Сырдык Эйгэ» норуот айымньытын дьиэтигэр Чурапчы, Бахсы, Хадаар, Тумул, Төҥүлү, Майа, Хаптаҕай ураты көрүүлээх, аан дойду дьиктилэрин мунньааччылар тоҕуоруһа муһуннулар. Бу күн коллекция быыстапканы көрүү, атастаһыы, атыы-тутуу тэрилиннэ. Биһиги кыргыттарбыт көрдөөбүттэрин булан, коллекцияларын ситэринэн, хаҥатан астыннылар.
Дьон ордук Наталья Григорьева уруучкаларын коллекциятын, Зинаида Теренкова ложкаларын, Ирина Филиппова сүүтүктэрин, самовардаах открыткаларын наборун, Анна Лукина куукулаларын, София Иванова календариктарын, Надежда Собакина открыткаларын сэҥээрдилэр, биһирээтилэр. Быыстапка кэмигэр «Саамай былыргы коллекцоннай мал», «Саамай кыра коллекционнай мал», «Саамай улахан коллекционнай мал», «Элбэх көрүҥ коллекциялаах кыттааччы» анал ааттар олохтоннулар.
Тэрээһин үөрүүлээх чааһыгар эҕэрдэ тыллар, баҕа санаалар этилиннилэр. «Эксклюзив» коллекционердар түмсүүлэрин кэрэ аҥардара нэһилиэк духуобунай олоҕун актыыбынай кыттааччылара, ол курдук кинилэр «Сайдыына» үҥкүү бөлөҕөр утумнаахтык дьарыктаналлар. Бу күн «Дэйбэрэҥ» үҥкүүнэн коллекционердары эҕэрдэлээтилэр, киэҥ биһирэбили ыллылар.
София Иванова: «Чурапчы улууьун биир ытык сиригэр Бахсы нэһилиэгин колекционнердарын ыҥырыыларын ылынан, тэрийэн, түмэн олус үчүгэйдик сылдьан астынан кэллибит. Эксклюзив кыттылаахтарыгар элбэх ситиһиини, барыыны-кэлиини, баайгытын хаҥатынан иһэргитигэр баҕарабын». Ирина Филиппова: «Дьэ,бэртээхэй сырыы буолла. Улууспут биир кырдьаҕас нэһилиэгэр-Бахсыга ыҥырыы тутан үөрэ-көтө хомулла охсон баран кэллибит. Бахсы «Сырдык Эйгэ» сабыс саҥа, сып- сылаас, сып-сырдык дьиэтигэр от сытынан ыраастанан, алаадьынан саха мааны далбардара күндүлээн көрүстүлэр. Күө-дьаа мустан, маанылаах малларбытын таһааран, атастаһыы, атыылаһыы саҕаламмыта. Мин, дьэ баҕа санаабынан мельхиор, алюминий подстаканник, сүүтүк, алтан тимэх, штампалаах сүүтүк атастаһан үөрдүм-көттүм. Дьон араас мунньуутун көрөн сөхтүм».
Тэрээһин түмүгэр мааны сандалы тула олорон, күө-дьаа кэпсэтэн, оонньоон-көрүлээн астынан тарҕастыбыт. Бахсы историятын сэргии истэн өссө да Бахсы сиригэр-уотугар ыалдьыттыахпыт, билсиэхпит-көрсүөхпүт диэн баҕа санаалаах кэллибит. Тэрээһиҥҥэ кыттарбытыгар көмөлөспүт «Тускул» КСК директорыгар Николай Дьячковскайга, сыыдам сырыылаах суоппарбытыгар Анатолий Тарасовка махталбытын биллэрэбит. Биир сомоҕо буолан айа-тута үлэлиэҕиҥ-хамсыаҕыҥ!
