НЭҺИЛИЭК СОЛУННАРА
2025 сыл балаҕан ыйын 14 күнүгэр Национальнай библиотека төрүттэммитэ 100 сылын туолла. Бу бэлиэ даатаҕа анаан Өрөспүүбүлүкэ библиотекаларын үрдүнэн биир «СОХРАНЯЯ ТРАДИЦИИ, СОЗДАЕМ БУДУЩЕЕ» диэн медиауруок ыытылынна. Уруогу С.Д.Флегонтов аатынан Хадаар орто оскуолатын библиотекатын кытары холбоһуктаах ыыттыбыт. Медиауруок оскуола оҕотугар сааһыттан тутулуга суох ананан ыытылынна. Оҕолор Национальнай библиотека сайдыытын туһунан таҥыллыбыт видеону көрдүлэр, биктэриинэҕэ кытыннылар.
Нэдиэлэ устата «КЭРЭНИ КЭРЭХСИИР КИРГИЭЛЭЙЭПТЭР» быыстапка дьон-сэргэ интэриэһин, сэҥээриитин ылла. Кэлбит дьон быысапканан, сөрүөнэн араас темаҕа оҥоһуллубут олус үчүгэй ис хоһоонноох үлэлэри дуоһуйа көрдүлэр, үлэлэр олус кэрэлэрин таһынан уустугун сөхтүлэр. Дойдуларыгар бэриниилээх дьон баар буолан төрөөбүт-үөскээбит, улааппыт-олорбут түөлбэлэригэр бу ураты үлэлэрин быыстапкаҕа туруоран төрөөбүт дойдуга махталы, тапталы саҕаллара саарбахтаммат.
Балаҕан ыйын 27 күнүгэр, Өрөспүүбүлүкэбит судаарыстыбаннаһын күнэ. Бу күн тыа сирин сайдар киинигэр төрөөбүт дойдубут устуоруйатын кэпсиир «САХА РЕСПУБЛИКАТА» диэн кинигэ быыстапката турда. Тэрээһини Арассыыйа, Саха Өрөспүүбүлүкэтин Өрөгөйүн ырыаларынан сүһүөхпүтүгэр туран саҕалаатыбыт. Үөрүүлээх чааска эҕэрдэ тылы «Хадаар нэһилиэгэ» тыа сирин түөлбэтин баһылыгын солбуйааччы Перизат Дьячковская эттэ, биир сомоҕо буолан үлэҕэ-хамнаска ситиһиилэри баҕарда. Күн эргииринэн хааман кэрэни, сырдыгы түстүүр оһуохайы оройуттан ылан, оһуохай түһүлгэтигэр эргийдибит. Салҕыы олохтоох библиотека, «Тускул» култуурнай-спортивнай киин тэрийиитинэн сылын ахсын Өрөспүүбүлүкэбит судаарыстыбаннаһын күнүн көрсө ыытыллар «МОСТ ПОКОЛЕНИЙ” квест оонньууну ыыттыбыт. Бу оонньууга нэһилиэк түөлбэлэрэ 4-түү киһиттэн састааптаах хамаанда туруоран кытыннылар. 5 станцияны ааһан I миэстэ «ЭРЭЛ» түөлбэ (сал. З.Теренкова), II миэстэ «КЭСКИЛ» түөлбэ (сал. З.Лукина), III миэстэ «САРДАҤА» түөлбэ (сал. Л.Лукина) ылары ситистилэр.
Бу күннэргэ анал байыаннай дьайыыга кытта сылдьар байыастарбытыгар Чурапчы улууһуттан уочараттаах командировкаҕа барыы буоларынан нэһилиэкпитигэр көмө хомуура оҥоһулунна. Нэһилиэк дьоно-сэргэтэ СВО буола турарын, биир дойдулаахтарбыт байыаннай дьайыыларга кытта сылдьалларын өйөөн-өйдөөн биир сомоҕо буолан бу үтүө дьыалаҕа кыттыстылар. Бары кыттыспыт, көмөнү оҥорбут дьоммутугар-сэргэбитигэр Спиридонова М.Е., Дьячковская Т.Н., Дьячковская Е.А., Мордускина А.Д., Ноговицына П.И., Теренкова З.Н., Варламова М.Н., Титова В.К., Андросова А.А., Лукин А.Е., Никонова В.В., Никонова Ф.В., Игнатьева К.С., Адамов М.М., Сидоров Е.И., Алексеева К.М., Лукина С.П., Артемьева М.С., Лукина Р.И улахан махталбытын биллэрэбит.
