Хадарская модельная библиотека

Кулун тутар 20 күнүгэр Чурапчы улууһун Хадаар нэһилиэгин «Мичил» уһуйааныгар оҕо доруобуйатын бөҕөргөтөр сыаллаах «Чэгиэн» туустаах хоһу арыйыы үөрүүлээх чааһа буолла.

Бэлиэ тэрээһиҥҥэ «Хадаар нэһилиэгэ» тыа сирин түөлбэтин баһылыга Афанасий Степанов, Чурапчы улууһун үөрэҕин управлениетын уопсай үөрэхтээһини сүрүннүүр специалиһа Маргарита Оконешникова, А.П.Илларионов аатынан Хайахсыт орто оскуолатын дошкольнай үөрэхтээһиҥҥэ директоры солбуйааччы Мотрена Илларионова, С.С.Яковлев-Эрилик Эристиин аатынан Чакыр орто оскуолатын дошкольнай үөрэхтээһиҥҥэ директоры солбуйааччы Наталья Макарова, уһуйаан бэтэрээн үлэһиттэрэ, нэһилиэк тэрилтэлэрин салайааччылара, уһуйаан төрөппүттэрин комитетын ааттарыттан бу үлэни көҕүлээбит бэтэрээн үлэһит Надежда Листиковаҕа, өйөөбүт уһуйаан сэбиэдиссэйэ Мария Гаврильеваҕа, бары үлэһиттэргэ уонна иитиллээчилэргэ муора салгыннаах хоско оҕолор сылдьан, доруобуйаларын тупсарыналларыгар баҕаран туран, махтанан, үөрүүлээх күннэринэн итиитик-истиҥник эҕэрдэлээн тыл эттиллэр.

«Билиҥҥи оҕо иммунитета көтөҕүллэригэр, тумууга элбэхтик ыалдьыбаттарыгар, ааспат сөтөллөөхтөргө көмөлөөх буоллун диэн арыый атын, аныгылыы солун хайысханы киллэриэхпин баҕарарым. Сылан уһуйааныгар туустаах хосторун көрөн, сүбэлэтэн, ыйыталаһан, син кыаллар эбит дуу диэн санааттан кынаттанан үлэбин саҕалаабытым. Эмтиир хоско Кэмпэндээйи тууһа туһаныллар. Иитиллээччилэр медицинскэй үлэһит кэтэбилинэн, анал графигынан туус хоһугар киирэн 20-30 мүнүүтэ сылдьыахтаахтар. Сеанс кэмигэр музыка истиэхтэрин, аралдьытар ойуулуктары көрүөхтэрин, кыра тэрээһиннэр, оонньуу курдук дьарыктар буолуохтарын сөп. Туустаах хоско киирбит оҕо куттуун-сүрдүүн холкутуйдун диэн муора тематын таламмыт, араас өҥнөөх балыктары быһан оҥордубут, уотунан-күөһүнэн киэргэттибит. Эмтиир дьайыылаах, тыҥаҕа туһалаах процедураны оҥорор хос аһылларыгар күүс-көмө буолбут бары уһуйааным коллективыгар, сэбиэдиссэй Мария Анатольевнаҕа, «Хадаар нэһилиэгэ» тыа сирин түөлбэтин баһылыгар Афанасий Степановка, сүбэ-ама буолбут бар дьоммор махтанабын. Бу хос инникитин оҕолор доруобуйалара тупсарыгар, чөлүгэр түһэригэр улахан күүс, көмө, кыайыы буоллун»— диэн санаатын үллэстэр Надежда Ивановна.