Хадарская модельная библиотека

Олунньу 27 күнүгэр нэһилиэкпитигэр СӨ Экэниэмикэ миниистирин солбуйааччы Иван Елисеев салайааччылаах СӨ Ситэриилээх былааһын 2024 сыллааҕы үлэтин отчуоттуур мунньаҕар Улуу Кыайыы 80 сылынан үбүлүөйдээх мэтээлин нэһилиэк ытык кырдьаҕастарыгар, тыыл, үлэ бэтэрээннэригэр, Хадаар нэһилиэгин Бочуоттаах олохтоохторугар Марфа Никитинаҕа, Дмитрий Лукиҥҥа, Александра Софроноваҕа туттардылар. Үтүө суобастаах үлэтин, тыа хаһаайыстыбатын сайдыытыгар киллэрсибит кылаатын иһин, СӨ тыа хаһаайыстыбатын миниистирин Махтал суругун бааһынай хаһаайыстыба салайааччытыгар Радомир Ксенофонтовка туттардылар.

Олунньу 28 күнүгэр Чурапчы улууһугар «Ыал саргыта» сылыгар аналлаах Төлөй уонна Хатылы дьахтар сүбэлэрин холбоһуктаах «Саха төрүт үгэстэрэ» тэрээһиҥҥэ баран кыттыыны ылан кэллибит. Төлөйдөөҕү «Аартык» НАДь турбут нэһилиэк уран тарбахтаахтарын быыстапкатын сэргии, сөҕө-махтайа көрдүбүт. Үөрүүлээх чааска «Төлөй нэһилиэгэ» тыа сирин түөлбэтин баһылыга Игорь Николаев, улуустааҕы дьахтар сүбэтин бэрэссэдээтэлэ Анастасия Афанасьева эҕэрдэ тыллары эттилэр.

Салҕыы Хатылы нэһилиэгин далбардара ыыппыт сандалы маанылаах аһын астыыр, сатабылларын көрдөрөр маастар-кылаастарын көрдүбүт, үлэлэрин уопутун билистибит. Толору астаах сандалы тула Хатылы дьахтар сүбэтэ арыылаах саламааты астаатылар, минньигэс сыр оҥорон көрдөрдүлэр.

Саха төрүт дьарыгар туойга Төлөйдөөҕү «Өбүгэ ситимэ» куруһуок салайааччыта Наталья Гуляева маастар — кылааһа ыытылынна. Сырдыгынан сыдьаайар балаҕаҥҥа Наталья Егоровна ыалдьыттары үөрэ-көтө көрүстэ, үлэтин-хамнаһын, куруһуогун туһунан сырдатта.

Эрдэ бэлэмнэммит остуол тула олорон, ирэ-хоро кэпсэтэ-кэпсэтэ туой оҥоһуктарбытын чочуйан, оҥорон таһаардыбыт, буһара-хатара хааллардыбыт. Улууспут нэһилиэктэрин дьахтар сүбэлэрэ хайдах, туох үлэлии-хамсыы олороллорун көрөн, уопуттарыттан бэрсиһиннэрэн бу күммүтүн олус туһалаахтык атаардыбыт. Массыынанан хааччыйбыт «Тускул» култуура уонна успуорт киинин директорыгар Николай Дьячковскайга, суоппар уолбутугар Петр Пудовка истиҥ махталбытын тиэрдэбит.

Хадаар нэһилиэгин олохтоохторо байыаннай дьайыы саҕаланыаҕыттан биир дойдулаахтарыгар араас көмөнү оҥороллор. «Боевые шелкопряды Якутии» хамсааһыҥҥа кыттыһан харысхал сеткалары өрөн саҕалаабыппыт. Кулун тутар 6 күнүгэр Дьокуускай куоракка киирэн кураторбытын көрсөн, эбии материал, сетка ылан бу күннэргэ библиотека, администрация иһинэн сеткаларбытын өрүүнү саҕалаатыбыт.

Бу хамсааһыҥҥа ордук дьахталлар, ийэлэр, эбэлэр кыттыһан, ыҥырыыны ылынан көмөлөһөллөр, анал байыаннай дьайыыга кытта сылдьар уолаттарга ыраахтан да буоллар күүс, өйөбүл-тирэх буолаллар. Амарах санаалаахтарга бэриниилээх үлэҕит иһин махтанабыт!