Хадарская модельная библиотека

Төрүт тыл туттуллар,
Төрөөбүт түөлбэтиттэн.
Төлкөтө тутуллар,
Төрүт түөрэҕиттэн.

Олохтоох библиотека саха төрүт тылын уонна суругун-бичигин күнүн көрсө, олунньу 14 күнүгэр күнүс 15:00 чаастан, үгэс буолбут “САХАЛЫЫ ДЬЫКТААН-2025” суруйуутун ыытта. “Сахалыы дьыктаан” 2014 сылтан Национальнай библиотека иилээһининэн, төрөөбүт тылга, сурукка-бичиккэ аналлаах декада чэрчитинэн сахалыы таба суруйуу үөрэҕин олохсутар, иҥэрэр сыаллаах ыытыллар, Библиотека бу акцияҕа сылын ахсын кыттыһар.

Быйылгы дьыктааны С.Д.Флегонтов аатынан Хадаар орто оскуолатын саха тылын уонна литературатын учуутала Галина Николаевна Бандерова суруттарда, бэрэбиэркэлээтэ.

Дьыктааны сөптөөхтүк таба суруйуу түмүгүнэн: «БАСТЫҤ СУРУКСУТ» ааты — Раиса Лукина, Вера Баишева, Дария Елисеева ыллылар. «ҮЧҮГЭЙ СУРУКСУТ» ааты — Парасковья Тарасова, Августина Тарасова ыллылар. Бары кыттааччыларга туоһу суруктар туттарылыннылар.

Олунньу 14 күнэ — Аан дойдуга кинигэ бэлэхтиир күн. Бу күн библиотека пуондатын хаҥатыыга кинигэ бэлэхтээбит ааҕааччыларбытыгар махталбытын, саха тылын билиитигэр, бэйэни холонон көрүүгэ кэлэн кыттыыны ылбыт дьоммутугар махталбытын биллэрэбит.

Баар, Ийэ тыл, Төрүт тыл,
Баай, Уус тыл, Уран тыл.