Хадарская модельная библиотека

Тохсунньу 16 күнүгэр саҥа кэлбит сылынан, Эргэ Саҥа Дьылы көрсө,  үгэскэ кубулуйбут Уорҕабыт учаастагар Саҥа Дьыллааҕы тэрээһини ыытан, дьоммутун-сэргэбитин сэргэхситэн, үөрдэн кэллибит.

Учаастак дьонугар үөрүүнү- көтүүнү бэлэхтиир соруктаах, бука бары түмсэр сыаллаах, учаастак үлэтин, олоҕун өйүүр, сыаналыыр үөрүүлээх бэлиэ түгэн буолан ааста. «Хадаар нэһилиэгэ» тыа сирин түөлбэтин баһылыга Афанасий Степанов айа-тута, үлэлии-хамсыы сылдьар дьоммутун үтүө холобур оҥостон, үүммүт саҥа сылынан эҕэрдэлээн, түмсүүлээх, көхтөөх үлэлэрин иһин махтанан туран, наҕараадалары туттарда.

Тымныы оҕонньор сиэнинээн Хаарчааналыын оскуола-сад оҕолорун эҕэрдэлээн минньигэс бэлэхтэрин туттардылар.

Саҥа сылга Хадаардааҕы тыа сирин модельнай библиотеката уонна Уорҕа олохтоохторо ыкса сибээстэһэн, саҥа кинигэлэри уларсан ааҕалларыгар сөҥнөһүү оҥордулар. Учаастак үлэнэн эрэ буолбакка, өй-санаа, информация өттүнэн сайдыыны кытта бииргэ хаамсарыгар баҕарабыт. Сандалы тула олорон ирэ-хоро кэпсэтэн, Хадаар талба талааннаахтарын эҕэрдэлэрин истэн-көрөн, көргө-нарга көхтөөхтүк кыттан, хардарыта эҕэрдэлэһэн, сүүйүүлээх оонньууга кыттан бырааһынньыктан астынан хааллылар.