Хадарская модельная библиотека

Сандал сааһы көрсө кулун тутар 22 күнүгэр Хадаар нэһилиэгэр «Чараҥ» квартет «Сааскы вальс…» кэнсиэрэ буолан ааста. Квартетка Чурапчыттан төрүттээх кыргыттар түмсэн, бу киэһэ намыын муусука доҕуһуолунан ыллам ырыаларын бэлэхтээтилэр.

«ЧАРАҤ» квартет кэнсиэрин кэмигэр биир дойдулаахпыт Марианна Федотова-Намыына төрүт дойдутугар, Хадаар нэһилиэгин олохтоохторугар анаан сахалыы саҥа ырыаны сүрэхтээтэ. Биир дойдулаахпыт Анастасия Винокурова-Дайыына «Угуйар Хадаарым» диэн хоһоонугар, Марианна Федотова-Намыына матыыбыгар, доҕуһуолга холбоон ырыа гынан көтүттүлэр.

«Мин ийэм Анемподистова Мария Елисеевна Өкөр Өлөн алааһыттан төрүттээх. Бэйэбин өйдүөхпүттэн ийэбин кытта Хадаарга сылдьарбын өйдүүбүн, кэлбэтэх сайыным диэн суох, олус күндүтүк саныыбын. Эдьиийбин Елена Васильевнаны ийэм курдук саныыр киһим этэ. Ийэлээх, эдьиийим биһиэхэ алааспытыгар, сайылыкпытыгар күүстээх тапталы иҥэрэн, дойдубар тардыһыым күүстээх. Бу ырыаны мин эрэ ыллыам дии санаабаппын, эдэр ыччаттар эмиэ ыллаатыннар, ыллыы сырыттыннар диэн баҕа санаабын тиэрдэбин»-диэн Марианна Ивановна санаатын үллэстэр.

«Угуйар Хадаарым»

Анастасия Винокурова -Дайыына тыллара,
Марианна Федотова-Намыына мелодията,
Иван Наумов аранжировката, куолас устуута

Дойдум ыраас салгына,
Дууһабар сайан киирдэ,
Көстүбэт күүс кутуллан,
Көтөн барыах курдукпун.

Куруутун сүрэҕим тардыһар,
Төрүттэрим биһигэр,
Хаан аймахтыын алтыһар,
Халыҥ Хадаар сиригэр!

Үрүҥ-Күөлүм сөрүүкэтэр,
Ахтар сүрэхпин уоскутар,
Алааска чараҥым ыллыга,
Алгыс аартыгын арыйар.

Куруутун сүрэҕим тардыһар,
Төрүттэрим биһигэр,
Хаан аймахтыын алтыһар,
Халыҥ Хадаар сиригэр!

Күнтэн күн дойдум тупсар,
Сайдам ыала кэскиллэнэр,
Үөрэх билии үүнэр сайдар,
Үлэһит дьоно кэрэхсэнэр.

Куруутун сүрэҕим тардыһар,
Төрүттэрим биһигэр,
Хаан аймахтыын алтыһар,
Халыҥ Хадаар сиригэр!

Онтон биһиги олохтоохтор айар куттаах кыргыттарбытыгар Анастасиялаах, Марианнаҕа дойдугут туһунан саҥа ырыаны бэлэхтээбиккитигэр махтанабыт. Бу көтүппүт ырыаҕыт дойдутун ахтыбыт киһи дууһатын кылын таарыйар, дойдуга тардыһан элбэҕи толкуйдатар ырыа буоллун диэн баҕа санаабытын тиэрдэбит.

Кулун тутар 23 күнүгэр Дьокуускай куоракка аан бастакытын ыытыллыбыт өрөспүүбүлүкэтээҕи «ЧЫПЧААЛ — 2025» куонкуруска Хадаар нэһилиэгин «Сайдыына» үҥкүү бөлөҕө, салайааччы Изабелла Адамова баран кыттыыны ылан, «Чыпчаал II Үрдэлэ» ылары ситистилэр.

Коллектив хас биирдии кыттылааҕа үҥкүү кэрэ алыбар умсугуйан дьарыктанар, араас тэрээһиннэргэ, куонкурустарга кыттан, нэһилиэк уопсастыбаннай олоҕуттан туора турбаттар. Салайааччыларын тула мустан күннээҕи олохторун бэйэлэрэ киэргэтэллэр, сэргэхситэллэр. Үҥкүүлэригэр дьэрэкээн бэйэлээх көстүүмнэри арааһын бэйэлэрэ тигэн, араас киэргэллэри ураннык оҥостон айаллар-туталлар.

Кулун тутар 23 күнүгэр  эр дьон түмсүүтүн көҕүлээһининэн оҕолорго анаан Үрүҥ Күөл ортотугар каток оҥордулар. Оҕолор сааскы сынньалаҥнарыгар сибиэһэй салгыҥҥа көҥүл көччүйэр, сырылыыр сирдэнэн үөрүүлэрэ үгүс, астына-дуоһуйа, оонньуо-көрүлүө турдахтара. 

СӨ култууратын үтүөлээх үлэһитэ А.М.Новиков тэрийбит Майатааҕы «Көөчөөн-Көрө” көр-күлүү норуодунай театра 17-с төгүлүн «Сааскы сирэйдэр” көр-күлүү өрөспүүбүлүкэтээҕи бэстибээлин тэрийэн ыытар. Бу куонкуруска «Хадаар нэһилиэгэ» тыа сирин түөлбэтин дьаһалтатын үлэһиттэрэ «Балааҕыйа санаалара» сценканан онлайн көрүүгэ кыттаннар, II туурга ааһан кулун тутар 31 күнүгэр Мэҥэ-Хаҥалас, Майа сэлиэнньэтигэр кыттыыны ыллылар. Аркадий Новиков кэриэһигэр анаммыт күрэх Ходулов аатынан Култуура дыбарыаһыгар үрдүк таһымнаахтык ыытылынна. Куонкуруска барыта 20 коллектив, 40 күлүүлээх нүөмэри көрдөрдүлэр. «Көрдөөх Хадаардар» бөлөх «I истиэпэннээх Үрдэл» үрдүк аатын ыллылар.

Ону таһынан Аркадий Новиков оҕолоро туруорбут анал бириистэрин, салайааччы Марфа Артемьева «II Сытыы бөрүө» бастыҥ автор ааттары ылары ситистилэр. Көр-күлүү күнүн көрсө дьээбэни-хообону, көрү-күлүүнү көҕүлүттэн туппут күрэх кыттыылаахтарыгар  айар үлэҕитигэр ситиһиилэри, бар дьоҥҥутугар үөрүүнү-көтүүнү бэлэхтии сылдьыҥ диэн баҕа санаабытын тиэрдэбит.

Кулун тутар 28 күнүгэр Саха Өрөспүүбүлүкэтин Национальнай библиотеката тэриллибитэ 100 сылыгар ананан Чурапчы улууһугар Национальнай библиотека күннэрэ ыытылынна. Манна өрөспүүбүлүкэ улуустарын, Чурапчы бары нэһилиэктэрин  библиотекардара, култуура тэрилтэлэрин туһааннаах бэрэстэбиитэллэрэ, уопсастыбаннас кыттыыны ылла. Түмүккэ Чурапчы улууһун дьаһалтата уонна Саха национальнай библиотеката хардарыта бииргэ үлэлэһиигэ сөбүлэҥ түһэристилэр.