Хадарская модельная библиотека

Былыр былыргыттан саха эр киһитэ балыктыыр үгэһэ бу күҥҥэ тиийэн кэлбит өбүгэлэрбит дьарыктарын тиэрдэр сыалтан, биир санаанан Лукиннар халыҥ аймах эр дьоҥҥо, оҕолорго анаан куйуур күрэҕин тэрийдилэр. Муус устар 12 күнүгэр Үрүҥ Күөлгэ Хадаар нэһилиэгин олохтооҕо, общественник, маассабай спорду көҕүлээччи, «Куйуур» күрэҕин хас төгүл призера, чемпиона Захар Дмитрьевич Лукин 50 сааһыгар анаммыт «Күөх боллох көмүс хатырык» улуустааҕы «Куйуур – 2025» күрэҕэ үрдүк таһымҥа ыытылынна.

Сарсыарда 10 чаастан күрэҕи нэһилиэк ытык кырдьаҕаһа, хоту көһөрүллүү кыттыылааҕа, Хадаар нэһилиэгин, Чурапчы улууһун Бочуоттаах олохтооҕо, Захар Дмитрьевич аҕалаатар аҕата Дмитрий Константинович Лукин аал уокка айах тутан, алгыс этиититтэн саҕаланна. Үөрүүлээх чааска Захар Дмитрьевичка 50 сааһынан, үбүлүөйүнэн, «Чурапчы улууһа (оройуона)» үрүҥ көмүс бэлиэлээх Бочуотунай грамотата, улуус физ. култуура уонна спорт управлениетыттан Бочуотунай грамота, уһуннук үлэлээбит дьиэ-уот коммунальнай хаһаайыстыба тэрилтэтиттэн махтал сурук, Чурапчытааҕы спорт институтун эҕэрдэ суруга, Хадаар нэһилиэгэ тыа сирин түөлбэтин сайдыытыгар киллэрсибит кылаатын иһин III истиэпэннээх бэлиэнэн наҕараадаланна.

Күрэххэ хамаандаҕа 2 эр киһи уонна 1 оҕо киирэн күрэхтэстилэр. Барыта 8: Арыылаах-2, Төлөй-2, Чурапчы-2 уонна Хадаар 2 хамаандалара илин-кэлин түһүстүлэр. Балаһыанньа быһыытынан күрэхтэһии 3 этабынан барда. Бастаан, буоларын курдук куйуурдааһын буолла, манна Хадаар-1 хамаандата инники күөҥҥэ таҕыста, иккис Арыылаах-1, үһүс Төлөй-1 хамаандалара буоллулар.

Иккис этабынан эстафета: Арыылаах-2 хамаанда бастакы, Хадаар-2 иккис, Чурапчы-1 үһүс буоллулар. Ойбон тэһиитигэр Арыылаах-2 чорбойдо, иккис Арыылаах-1 таҕыста, үһүс Төлөй-1 тахсан үөрдүлэр-көттүлэр.

Түмүккэ хатыһыылаах киирсии кэнниттэн Арыылаах-2 уонна Арыылаах-1 хамаандалар тэҥ 8 очколанан таҕыстылар. Кыайыыны хаачыстыбанан баһыйан Арыылаах-2 хамаандата сурунна. Иккис Арыылаах-1 буолла, үһүскэ 12 очколаах Хадаар-1 хамаандата таҕыста. Кыайыылаахтарга кубок, грамота уонна Захар Лукин аҕата, бииргэ төрөөбүттэрэ, сиэн бырааттара, балыстара анаабыт бириистэрэ туттарылыннылар.

Ойбон тэһиитигэр абсолютнай күрэххэ 50 саастарыгар диэри 4,07 бирэмэни көрдөрөн Арыылаахтан Семен Сивцев уонна 50 үөһэ саастаахтарга Василий Сивцев ыланнар Захар Дмитрьевич анаан туруорбут бирииһин-анньыы туттулар. Күрэх кэмигэр кыттаачыларга анаан итии чэй, фуршет тардылынна, шашлык астанна. Онон ыалдьыттарбыт тото-хана аһаан, илии тутуурдаах, өттүк харалаах тарҕастылар. Маны таһынан араас анал бириистэр туттарылыннылар: «Саамай бастакы балык»-Төлөй, «Саамай улахан собо»-Кузьмин Н.Н. (Хадаар-1), «Саамай аҕа саастаах»-Нохтунскай Г.Ф. (Чурапчы), «Саамай эдэр саастаах»— Э. Дьячковский (Телей), Төлөйтөн Дьячковскай А. икки уолун илдьэ сылдьара, саха төрүт дьарыгар уһуйара хайҕанна, Төлөйтөн бастыҥ куйуурдьут, Смирников Н., бэйэбит куйуурдьут, спорду өрө тутааччы дьоммут Владимир Спиридонов, Афанасий Андросов бэлиэтэннилэр.

Тэрээһини ыытарга спонсордаабыт дьоммутугугар: Чурапчытааҕы спорт институгар, нэһилиэк администрациятыгар, ООО ДСМ компанияҕа, Раиса Ивановна бииргэ төрөөбүттэригэр,   бары аймахтарга уонна куйууру тэрийэн-бэрийэн ыыппыт Иван Макаровка, «Хадаар нэһилиэгэ» тыа сирин түөлбэтин баһылыгар Афанасий Степановка, «Тускул» култуура уонна спорт киинин үлэһиттэригэр, директор Николай Дьячковскайга улахан махталбытын тиэрдэбит!

Бу курдук сибиэһэй сааскы салгыҥҥа бэртээхэй куйуур күрэҕэ буолан ааста.