Хадарская модельная библиотека

Кулун тутар 25 күнэ — Арассыыйа култууратын үлэһиттэрин күнэ. Бу күнү көрсө Хадаардааҕы “Тускул” норуот айымньытын дьиэтин 50 сыллаах үбүлүөйүгэр ананан тахсыбыт кинигэни билиһиннэрэбит. Кинигэҕэ норуот айымньытын дьиэтин историята, киэҥ кэскиллээх үлэтэ, үрдүк ситиһиилэрэ, үлэлээн ааспыт дьон ахтыылара, Хадаар нэһилиэгин киэн туттар дьонноро, талааннара сырдатыллар. Ааҕааччы киэҥ эйгэтигэр ананар.

I түһүмэх-Култуура дьиэтин маҥнайгы саҕахтара. Сэбиэскэй былаас олохсуйарын кытта оройуоҥҥа ликбезтэри аhыы, дьону ааҕарга-суруйарга үөрэтии, хотону дьиэттэн араарыы, буор муосталаах дьиэлэри муосталааhын, ыраас олох иhин, таҥара итэҕэлин утары охсуhуу, ойууттары, удаҕаттары албын итэҕэллэриттэн аккаастаннарыы соруктара күүскэ турбуттара. Кулууптары туттарарга, ааҕар балаҕаттары астарарга оройуон комсомолецтара, ыччаттара турунан үлэлээбиттэрэ. Нэhилиэктэр аайы ыччаттар көҕүлээhиннэринэн пьесалары көрдөрөн…

II түһүмэх-Айымньылаах аартык арыллыыта. 1969 сыл мас кэрдиллэр. 1970 сыл саас траншеялар  хаhыллаллар, буруус маhа Ньаҕаатты үрдүттэн уонна котельнай маhа Тоҕолдьугантан, кыра мастар Сааба алааhын үрдүттэн уонна Ампаардаах чараҥыттан кэрдиллибиттэрэ. Оччолорго Ампаардаах чараҥа солонорго былааннаммыт кэмэ этэ. Билигин аатын уларытан тураллар. 1969 сылтан Хадаарга саҥа кулууп тутуута саҕаламмыта уонна 1971 сыл ахсынньы 14 күнүгэр үлэҕэ киирбит күнүн бэлиэтээhин буолбута…

III түһүмэх-Билии-көрүү бараммат байҕала. 1956 сылтан кулууптан библиотека арахсан туспа үлэһиттэнэр. Бу иннинэ нэһилиэк түөрт холкуоһугар барыларгар ааҕар балаҕаннар тэриллибиттэрэ. Холкуостаахтар мустар сирдэригэр, элбэх ыал түөлбэлээн олорор алаастарыгар түмсэллэрэ. Ылбыт кинигэлэрин уларса сылдьан ааҕаллара, сорох ыалга үлэ-хамнас бүппүтүн кэннэ бары мустан кинигэни, хаһыаты биир үчүгэйдик саҥарар киһиэхэ аахтаран истэллэрэ…

IV түһүмэх-Киинэ сайдыыта. Хадаарга киинэни адьас эрдэ көрбүт курдук кэпсииллэр. Быһа холуйдахха, 1935 с. бастаан “Чапаевы” көрбүттэр. Сайын Сири Холлоҕос сайылыкка оройуонтан икки киһи динамик диэн тэриллээх тахсан көрдөрбүттэр уонна Чакырга ааспыттар…

V түһүмэх-Уорҕа кулууба култуура киэлитигэр. Бу түһүмэххэ Уорҕа кулуубар үлэлээн ааспыт дьон ахтыыларын ааҕыаххыт.

VI-Үтүөнү үксэтэр аналланан. Бу түһүмэххэ кулууб сэбиэдиссэйдэрин, директордарын, уус-уран салайааччылар ахтыыларын ааҕыаххыт.

VII-Айар талаан сирдьиттэрэ. бу түһүмэххэ ырыа түһүлгэтэ (ырыаһыттар, мелодистар) тустарынан, байаан кэрэ доҕуһуолун толорбут дьоммут туһунан, үҥкүү түһүлгэтэ, театр түһүлгэтэ, уран тыл биһигэ, норуот масстардарын, худуоһунньуктарын, уустарын туһунан билсиэххит.

VIII түһүмэх-Култуура эйгэтигэр суолларын хаалларбыт биир дойдулаахтарбыт тустарынан ааҕыаххыт, ахтыыларын сэҥээриэххит.

IХ түһүмэх-Үүнүү-сайдыы суолунан. Ити кэмнэргэ айымньылаахтык үлэлээбит коллектив үлэтин-хамнаһын туһунан билсиэххит.