Хадарская модельная библиотека

«Боевые шелкопряды Якутии» волонтерскай хамсааһын Дьокуускай куоракка 2024 сылтан тэриллэн үлэлиир. Анал байыаннай дьайыыга (СВОҕа) сылдьар буойуттарбытыгар сылаас таҥаһы тигэллэр, наскылары, маскировачнай сеткалары өрөллөр, харысхаллары оҥороллор. Ийэ дойдуларын көмүскүү, Анал байыаннай дьайыыга аттанар уолаттары алҕаан, тэрийэн ыыталлар. РФ — «Аҕа дойдуну көмүскээччи», СӨ -«Ийэ дойдуну көмүскээччи», Чурапчы улууһугар — «Үйэлээх килбиэн», Хадаар нэһилиэгэр -«Ийэ дойдуга бэриниилээх буолуу», Улуу кыайыы 80 сылларыгар анаан бу хамсааһыны «Хадаар нэһилиэгэ” тыа сирин түөлбэтин баһылыга Афанасий Степанов быһаччы тэрээһининэн, «Кэрэ Ситим» дьахталлар түмсүүлэрин өйөбүллэринэн барар. Бу сыл олунньу ыйтан Чурапчы улууһун, Хадаар нэһилиэгэ «Боевые шелкопряды Якутии» хамсааһыҥҥа олохтоох волонтердар түмсэн кыттыстылар. Ол курдук 5 киһиттэн турар састаап Дьокуускай куоракка баар «Боевые шелкопряды Якутии» волонтердар хамсааһыннарыгар киирэн, кураторбыт Вера Николаевна Егорованы, волонтер Елена Егоровна Адамованы кытары билсэн, байыаннайдарга олус наадалаах маскировочнай сеткаларын баайарга, өрөргө үөрэнэн таҕыстыбыт.

Нэһилиэкпитигэр тахсан, олохтоохторго ыҥырыы ыытан, тыа сирин сайдар киинигэр, С.Д.Флегонтов аатынан Хадаар орто оскуолатыгар, «Мичил» уһуйааҥҥа мустан харысхал сеткаларбытын, харысхаллары оҥорууну өрөн саҕалаатыбыт. Бу үтүө дьыалаҕа нэһилиэк дьоно-сэргэтэ, тэрилтэлэрэ, үөрэнээччилэрэ бары бүттүүн кыттыстылар.

Хомуллан барар посылкаларга уган ыыталларыгар анаан ийэлэрбит, эбэлэрбит алгыстаах санааларын иҥэрэн, илиилэрин иминэн 70 устуука харысхал оҥордулар. Бу харысхаллар уолаттарбытын харыстаатын, арчылаатын, өлөр өлүүттэн өрүһүйдүн диэн алҕыы хаалабыт.

Чурапчы улууһугар байыаннай дьайыыга сулууспалыы сылдьар уолаттарга көмөнү оҥоруу тиһигин быспакка салҕанар. Хадаар нэһилиэгин тыа хаһаайыстыбатын исписэлииһэ Матрена Дьячковская иилээн-саҕалаан олохтоох бааһынай, ону тэҥэ чааһынай хаһаайыстыбалартан көмө — собо балык, эт, арыы, барыанньа хомуйан уопсастыбаннай хамсааһын пуунугар туттарда. Күүс-көмө буолбут С.С.Анемподистова, П.Н.Игнатьев, Л.Н.Ноева, Р.Н.Ксенофонтов, И.Д.Ксенофонтов, М.М.Кондратьев, М.М.Григорьев, В.В.Никонов, чааһынай И.Н.Дьячковскай, В.И.Гаврильев хаһаайыстыбаларыгар махталбытын биллэрэбит.

Нэһилиэк салҕыы даҕаны байыастар этэҥҥэ, кыайыы аргыстаах кэлэллэрин туһугар үлэлиэҕэ. Бары кыттыбыт, кыттыыны ыла сылдьар дьоммутугар-сэргэбитигэр, нэһилиэк тэрилтэлэригэр улахан махталбытын тиэрдэбит!