«САТАБЫЛ АЗБУКАТА» кинигэ сүрэхтэниитэ.
Кулун тутар 20 күнүгэр Хадаар нэһилиэгэр педагогика билимин хандьыдаата, СӨ үөрэхтээһинин үтүөлээх үлэһитэ, ССРС, РСФСР үөрэхтэрин туйгуна, РФ үөрэҕин «Мастер и наставник производственного воспитания» аат хаһаайына, Россия уонна Саха сирин үөрэҕириилэрин наставнига, СӨ методиһа, Учууталлар учууталлара, СӨ тыатын хаһаайыстыбатын туйгуна, норуоттар икки ардыларынааҕы «Инновация и развитие» форум бочуотунай уонна Антон Семенович Макаренко аатынан мэтээллэр хаһаайыннара, Саха сирин агро оскуолаларын бочуоттаах наставнига, отучча кинигэ ааптара, СӨ бочуоттаах кырдьаҕаһа, хоту көһөрүллүү кытыылааҕа, биир дойдулаахпыт Петр Петрович Кондратьев- «САТАБЫЛ АЗБУКАТА» кинигэтэ сүрэхтэннэ.
Бу күн Петр Петрович кэнники бэйэтэ суруйбут 11 методическай уонна 5 художественнай кинигэлэринэн, ону таһынан 2018 с. убайа Михаил Петрович Кондратьев суруйан хаалларбыт «Мин сэһэргиим – эһиги истиҥ» ,диэн харыларын күүһүнэн үлэлээн ааспыт биир дойдулаахтарын туһунан кинигэтин таһааран бэлэхтээбитин «ҮТҮӨҔЭ ДЬҮККҮЙҮҮ» быыстапканан көрдөрдүбүт. Бу кинигэлэри сыаналыыбыт, куруутун туһанабыт уонна махтанабыт.
Кыттыыны ыллылар:
— Петр Петр Кондратьевы кытары ыкса, чугас үлэлэспит Иван Егорович Федосеев – Доосо аатынан Дириҥ орто агро оскуолатын чинчийэр үлэҕэ дириэктэри солбуйааччыта Саргылана Васильевна Тарасова.
— «Сатабыл азбуката” кинигэни редакциялаабыт, учуутал Самсоновтар ааттарынан Хатас орто агро оскуолатын дириэктэри үөрэх хаачыстыбатын тупсарыыга солбуйааччыта Сардаана Петровна Иванова.
– Петр Петрович Кондратьев кэргэнэ Нелли Николаевна Кондратьева.
– Чурапчы улууһун үөрэҕин салалтатын сүрүннүүр специалиһа Артемьев Николай Петрович.
– Саха Өрөспүүбүлүкэтин агро оскуолаларын Союһун дириэктэрэ Дягилев Петр Гаврильевич.
– Семен Николаевич Донской-II аатынан Үөрэҕириини сайыннарыы уонна таһымы үрдэтии институтун специалиһа Данилова Сардаана Эркимбековна.
– Семен Николаевич Донской-II аатынан Үөрэҕириини сайыннарыы уонна таһымы үрдэтии институтун специалиһа Герасимова Александра Еремеевна.
– учуутал Самсоновтар ааттарынан Хатас орто агро оскуолатын инновацияҕа уонна агро хайысхаҕа дириэктэри солбуйааччыта Матвеев Николай Афанасьевич.
— Чурапчы нэһилиэктэрин оскуолаларын дириэктэрдэрэ.
— Петр Петрович хаан-уруу аймахтара – Герасим Дмитриевич Бястинов-Бэс Дьарааһын аатынан Чымнаайы орто оскуолатын биология, химия учуутала Кондратьев Петр Михайлович, бырааттара Кондратьев Михаил Михайлович, Климов Петр Николаевич.
«САТАБЫЛ АЗБУКАТА» 2024 сыл, “Компания “Дани-Алмас” типографиятыгар Дьокуускай куоракка бэчээттэнэн таҕыста. Кинигэ барыта 200 экземплярынан, орто киэбинэн-кээмэйинэн, халыҥ обложкалаах, 79 страницалаах бэчээттэнэн таҕыста. Кинигэ аннотациятыгар: «Кинигэ көннөрүллэн, эбиллэн, иккистээн бэчээттэнэр. Урукку аата «Сайыннарар кыах баар» диэн этэ. Кинигэ, сатабыл азбукатын олоххо туттуу кыаҕын арыйар. Саҥарар саҥаҕа, сатабылы аттарыыга бэлэмнээһининэн кини туттуллар күүһүн арыйарга сурулунна. Маны ылыныыга ааптар кластер үлэлиир ньыматын тутунна. Суруллубут үлэ саха улаатан иһэр ыччаттарыгар ыллыктаах саҥалаах үлэһит буолалларыгар көмөлөһүүгэ ананар» диэн суруллубута кинигэ ис хоһоонун арыйар. Ыытааччы кинигэ 10 кэрдиилэрин, 8 көмө дьайыыларын, 12 тэлгэһэлэрин ырытан кэпсээтэ.
Петр Петрович кыра эрдэҕиттэн хоһоону олус сөбүлээн истэрэ. Оччолорго скуолаҕа оҕолоро куоталаһа-куоталаһа «Кыым» хаһыат илииһигэр хоһоон суруйар үгэстээх этибит диэн ахтыллар. Итинтэн сиэттэрэн, 1958 сылтан бу идэҕэ баҕаран туран олохтоохтук дьарыктанан барбыта. С.Д.Флегонтов аатынан Хадаар орто оскуолатын үөрэнээччилэрэ Петр Петрович суруйбут хоһооннорунан тэрээһини саҕалаатылар.
Эҕэрдэ тылы куйаар ситиминэн Ил Түмэн депутаттарын, тус бэйэтин аатыттан Саха республикатын Ил Түмэнин бэрэссээдэтэлин солбуйааччыта Антонина Афанасьевна Григорьева эттэ. Бу кинигэ республика общественнаһыгар улахан суолталааҕын бэлиэтээтэ, Петр Петрович Кондратьев сырдык кэриэһигэр ананарын эттэ. Дириҥ билиилээх, үлэни-олоҕу сыаналыыр, таптыыр, дэлэгэй көҕүстээх, куту-сүрү иҥэриммит оҕолор буолалларын туһугар үтүө үгэстэргит үчүгэй түмүктээх буолуннар диэн баҕа санаатын тиэртэ.
Салҕыы тылы «Хадаар нэһилиэгэ» тыа сирин түөлбэтин баһылыга Степанов Афанасий Афанасьевич, Семен Дмитриевич Флегонтов аатынан Хадаар орто оскуолатын дириэктэрэ Тарасов Петр Петрович эттилэр. Ахтыы оҥорон, махтал, баҕа санааларын этэн туран кэлбит ыалдьыттарга эҕэрдэ суруктары, бэлэхтэри туттардылар.
Кэлбит ыалдьыттар бары Петр Петрович туһунан ахтыылары оҥорон, санааларын үллэстэн, баҕа санааларын этэн, махтанан тарҕастылар.
Үөрүүлээх, бэлиэ түгэни туһанан 2025 с. балаҕан ыйын 15 күнүгэр Кытай Хейхе куоратыгар ыытыллыбыт «Венера у моря» международнай куонкурус Гран-При хаһаайына «Иэйии» театральнай студия, С.Д.Флегонтов аатынан Хадаар орто оскуолата, «Хикари» тур фирма, «Бриллиантовые Нотки» бэстибээл ааттарыттан Хейхе куоратыгар, оҕо көмүскэлин күнүгэр ыытыллар «Оҕо саас» бырааһынньыгар сылдьарга анаммыт босхо путевканан С.Д.Флегонтов аатынан Хадаар орто оскуолатын 10 кылааһын үөрэнээччитэ, бастыҥ общественник, «Иэйии» театральнай студия иитиллээччитэ, П.П.Кондратьев быраатын сиэнэ Галактион Кондратьев дохсун ытыс тыаһын ортотугар, театральнай студия салайааччыта, СӨ култууратын туйгуна Яна Климова илиититтэн тутта.
«Үгүс сылларга иитиэхтээбит кинигэбин «САТАБЫЛ АЗБУКАТА» диэн ааттыыбын. Бу үлэм бэйэбэр уоскуйууну уонна дуоһуйууну аҕалла. Этиниибин харыстаһар тылларым – сатабыл үөрэҕин саҕалыахпыттан ыла кини кэскилин өйдөөн, өйөһөн сылдьар, сатабыл сайдыытын хонуутугар тэҥҥэ хаамсар бар дьоммор – сахаларга, кэлиэх кэскиллээх махталбын тиэрдэбин» -диэн Петр Петрович кэс тылынан кинигэ сүрэхтэниитэ түмүктэнэн, ыҥырыылаах ыалдьыттарбыт үөрэн-көтөн, махтанан тарҕастылар.