Өрөспүүбүлүкэтээҕи «Развитие моей малой Родины» стратегическай дьылабыай оонньуу чэрчитинэн ыытыллыбыт «Мэхээлэчээн булчут» тургутук-оонньуу.
Олунньу 27-28 күннэригэр Хадаар нэһилиэгэр С.Д.Флегонтов аатынан Хадаар орто оскуолатыгар Өрөспүүбүлүкэтээҕи «РАЗВИТИЕ МОЕЙ МАЛОЙ РОДИНЫ» стратегическай дьылабыай оонньуу ыытылынна. Бу тэрээһини СӨ «Н.Е.Мординов-Амма Аччыгыйа аатынан «КЭСКИЛ» оҕо бэчээтин кыһата» тэрийэн ыытта. Тэрээһиҥҥэ Таатта Чымынаайытын, Уус-Алдан Тандатын, Чурапчы гимназиятын, Хайахсыт, Хадаар медиа-киин эдэр кэрэспэндьиэннэрэ 5 хамаандаҕа арахсан Хадаар нэһилиэгин тэрилтэлэрин, бааһынай хаһаайыстыбаларын кэрийэн интервью ыллылар, нэһилиэк инники сайдыытын, олоҕун, үлэтин-хамнаһын туһунан иһиттилэр, сырдаттылар.
Саха киинэтэ көрөөччү дьүүлүгэр кулун тутар ыйга кэтэһиилээх, Александр Лукин режиссердаах «МЭХЭЭЛЭЧЭЭН БУЛЧУТ» киинэни көрөөччү киэҥ араҥатыгар таһаараары турар.
Бу тэрээһин чэрчитинэн нэһилиэк, оскуола библиотекалара Тимофей Сметанин уонна Яков Стручков «Мэхээлэчээн булчут кэпсээннэрэ» диэн айымньыларынан кэлбит оҕолорго тургутук-оонньууну ыыттылар. Мустубут оҕолорго анаан оонньуу айымньыны, айымньы суруйааччыларын туһунан быһа тардан билиһиннэрииттэн саҕаланна. Уопсайа 3 хамаанда, 5 тохтобултан турар, хас тохтобул ахсын толкуйдатар, өйү-санааны сайыннарар, толкуйу эрчийэр сорудахтары толорон умсугутуулаах айаны аастылар.
1 тохтобул- «Мэхээлэчээн булчут кэпсээннэрэ». Манна оҕолор кэпсээннэртэн быһа тардыыны айымньынан сааһылаатылар.
2 тохтобул — «Төрөөбүт тылгын төһө билэҕиний?» Булт тэриллэрин кроссворд нөҥүө таайдылар.
3 тохтобул — «Киинэ туһунан тугу билэҕитий?» Киинэ туһунан боппуруостарга эппиэт биэрдилэр.
4 тохтобул — Булчукка анаммыт тургутукка билиилэрин кэҥэттилэр.
5 тохтобул — «Байанай» ыйытыы-эппиэт хоруйдаатылар.
Илин-кэлин түсүһэн икки кыайыылаах хамаандаҕа киинэҕэ сылдьар ыҥырыы суругу бэлэх ууннулар. Оҕолор бэйэлэрэ хамаандаттан көхтөөхтүк кыттыбыттары талан Галактион Кондратьев (Хадаар), эдьиийдии-балыс Снежанна, Валерия Готовцевалар (Уус-Алдан, Танда) «Кэскил» оҕо бэчээтин кыһатын кылаабынай редактора Сардана Анатольевна Матвееваттан ыҥырыы суругу туттулар.
Мүлчүргэннээх “Мэхээлэчээн булчут кэпсээннэрэ” кинигэни ааҕыҥ, көрүдьүөс түгэннэриттэн күлүҥ, омуннаах быһыыларын сөҕүҥ, мындыр толкуйдарын сыаналааҥ!