Сэттиэлэ сэргэх сонуннара. Үйэлээх бэлэхтэр.
Кинигэ — билии-көрүү бараммат байҕала, өй-санаа уостубат кылаата. Нэһилиэк библиотекатыгар бу күннэргэ үйэлээх бэлэхтэри туттубут.
Биир дойдулаахпыт психологическай наука кандидата, М.К.Аммососв аатынан ХИФУ психология уонна социальнай кафедратын доцена Наталья Дмитриевна Елисеева «СЕМЬЯ В ЯКУТСКОМ МЕНТАЛИТЕТЕ», «ПРЕДСТАВЛЕНИЯ НАРОДА САХА О НРАВСТВЕННОМ ЧЕЛОВЕКЕ» монография кинигэлэрин бэлэх уунна.
«Чурапчы улууһа (оройуона)» МТ салалтата 2014-2021 сс. ыытан кэлбит үлэтэ-хамнаһа «СОРУКТАР УОННА СИТИҺИИЛЭР» кинигэ-альбомҥа сылларынан улахан событиеларынан сырдатылынна. Бу сылларга улуус баһылыга А.Т.Ноговицын тэрийэн кэлбит үлэтэ-хамнаһа хаартыскаларынан, ыстатыйаларынан киирбит кинигэтэ.
Саха сиригэр бастакы тахсыбыт, анал байыаннай дьайыыга дойдуларын чиэһин көмүскээн, сырдык тыыннарын толук уурбут Герой уолаттарбыт олохторун, хорсун быһыыларын сырдатар «ВЫ НАШЕЙ ПАМЯТЬЮ ХРАНИМЫ И БУДЕТЕ ВСЕГДА ЖИВЫМИ» өйдөбүнньүк кинигэни Вера Афанасьевна Дьячковская бэлэх уунна. «Тапталлаах Хадаарым дьоно-сэргэтэ, ытыктыыр бар дьонум! Оҕом Сокольников Прокопий Степанович сырдык аатын, этиллибэтэх кэриэһин, олорботох олоҕун хаһан да умнумаҥ диэн, оҕом умнуллубат аата киирбит кинигэтин төрөөбүт дойдутугар Хадаарга бэлэх биэрэбин». Үйэлээх бэлэхтэри-кинигэлэри утары ууммут дьоммутугар барҕа махталбытын тиэрдэбит. Кинигэлэри нэһилиэк, оскуола библиотекаларыттан уларсан ааҕыҥ, сэргээн диэн ыҥырабыт.
Олунньу 19 күнүгэр нэһилиэк олохтоохторугар анаммыт, буолаары турар «ЗИМНИЕ СЕЛЬСКИЕ ИГРЫ» бырайыак чэрчитинэн маастар-кылааһы ыытар Василий Лукин, NL компания партнера Оксана Лазарева доруобуйаҕа туһалаах продукция туһунан сырдаттылар, кэпсээтилэр, араас туһалаах сүбэлэри биэрдилэр.
Салҕыы спортивнай саалаҕа түһэн Василий Васильевич, Егор Дмитриевич түөлбэлэр икки ардыларыгар ыытыллар «ЗИМНИЕ СЕЛЬСКИЕ ИГРЫ» көрүҥнэригэр киирбит күрэхтэр, доруобуйаны тупсарар, эти-хааны уһугуннарар эрчиллиилэрин көрдөрдүлэр.
Түмүккэ сүүйүүлээх оонньуу ыытан, сүүйүүлээхтэр NL компания продукциятын бэлэх тутан үөрдүлэр-көттүлэр.
Хадаардар бу курдук спорду, доруобуйаны, чөл олоҕу өрө тутан эрчиллэллэр, саҥа бырайыакка олохтоохтору түөлбэнэн түмэ тардан, өрүү да буоларын курдук көхтөөхтүк кыттарга бэлэмнэр! Биир дойдулаахтарбытыгар Оксана Васильевнаҕа, Василий Васильевичка махталбытын биллэрэбит.
Олунньу 20 күнүгэр Амма улууһун Сатаҕай нэһилиэгин дьаһалтата, исписэлиистэрэ делегация тэринэн уопут атастаһа Хадаар нэһилиэгэр ыалдьыттаатылар. Үлэ араас салааларыгар, хайысхаларыгар сырыттылар, үлэ-хамнас хаамыытын билистилэр.
«Сатаҕай нэһилиэгэ» тыа сирин түөлбэтин баһылыга Алексей Васильевич Шишигин «АТААРА ХААЛБЫТА АЛААҺЫМ…» Амма улууһун Сатаҕай нэһилиэгиттэн 1941-1945 сс. Аҕа дойду Улуу сэриитигэр кыттыыны ылбыт, үлэ фронугар сылдьыбыт дьон туһунан кэпсэнэр кинигэни, «Саха киэн туттар дьоно» серия кинигэҕэ киирбит биир дойдулаахтара, СӨ «Гражданскай килбиэн» уонна «Олохтоох бэйэни салайыныы сайдыытыгар үтүөлэрин иһин» анал бэлиэ туһааннааҕа, уһун кэмҥэ Сатаҕай нэһилиэгин баһылыгынан үлэлээбит С.Д.Давыдов туһунан кинигэни бэлэх уунна.
Ити курдук, олус тэрээһиннээхтик сылдьан биир үлэ күнэ өрө көтөҕүллүүлээхтик, үлэ хаачыстыбатын тупсарыыга уонна идэлэрин таһымын үрдэтиигэ туһуланан олус сэргэхтик ааста. Биир идэлээхтэр мустан, уопут атастаһан, бэйэлэрин үлэлэрин билиһиннэрэн-билсиһиннэрэн, атын дьонтон үөрэнэн, сэргэхсийэн, эбии саҥаны көрөн тарҕастылар.
Олунньу 20 күнүгэр Аҕа дойдуну көмүскээччилэр күннэрин чэрчитинэн Хадаар нэһилиэгин эр дьоно түмүллэн Чурапчы улууһугар шефтээх ЧГИФКиС уораҕайыгар көрсүһүүгэ сырыттылар. Төгүрүк остуол тула олорон санааларын атастастылар, түмсүү тула үлэ былаанын ылыннылар. Эр дьоҥҥо анаммыт ытыы, дартс көрүҥнэригэр илин-кэлин түсүһэ күрэхтэстилэр.
Түмүккэ дартс көрүҥэр: 1 миэстэ Захар Лукин, 2 миэстэ Николай Дьячковскай, 3 миэстэ Дмитрий Мордускин ыллылар.
Эдэрдэргэ ытыы күрэҕэр 1 миэстэ Василий Лукин, 2 миэстэ Петр Дьячковскай, 3 миэстэ Григорий Решетников ылары ситистилэр. Бэтэрээннэргэ ытыыга 1 миэстэ Дмитрий Климов, 2 миэстэ Иван Лукин, 3 миэстэ Егор Елисеев буоллулар. Автомат сааны хомуйуу күрэҕэр 1 миэстэ Владислав Романов, 2 миэстэ Иван Гаврильев, 3 миэстэ Дмитрий Климов илин-кэлин түсүһэн ыллылар. Кыайыылаахтар мэтээлинэн, грамотанан, бириистэринэн наҕараадаланнылар.
Бары нэһилиэкпит эркин курдук эрэллээх эр дьонун Аҕа дойдуну көмүскээччилэр күннэринэн итиитик-истиҥник эҕэрдэлиибит! Барыгытыгар чэгиэн-чэбдик туругу, энчирээбэт эрчими, булгуруйбат модун санааны баҕарабыт.