Сэттиэлэ сэргэх сонуннара
Сэтинньи 7 күнүгэр «Айылгы» Норуот айымньытын дьиэтигэр «СВОих не бросаем» диэн анал байыаннай дьайыыга (СВО)ҕа сылдьар уолаттарбытыгар аналлаах Көмө Акция тэриллэн ыытылынна. Бу акцияҕа Хадаар нэһилиэгин «Кэрэ Ситим» дьахталлар түмсүүлэрэ туора турбакка кыттыыны ылла, үтүө дьыала оҥорон астынныбыт. Ол курдук, олохтоох нэһилиэнньэ дьоно-сэргэтэ Анна Андросова, Татьяна Дьячковская, Мария Спиридонова, Ирина Филиппова, Люция Лукина, Александра Листикова, Раиса Лукина, Валентина Сидорова, Парасковья Ноговицына, Марина Власьева, Марфа Артемьева, Мария Гаврильева, Фекла Романова үбүнэн-харчынан, аһынан-үөлүнэн көмө оҥорон, амарах санаалаахтарын биллэрдилэр.
Чурапчы күүһэ-түмсүүгэ!
Кыайыы туһугар! Уолаттарбыт тустарыгар!
Сэтинньи 13 күнэ — Саха Өрөспүүбүлүкэтин бастакы бэрэсидьиэнэ Михаил Ефимович Николаев төрөөбүт күнэ. Михаил Ефимович Саха Өрөспүүбүлүкэтин 1992 сылтан 2002 сылга диэри сатабыллаахтык салайбыта. 2002 -2010 сс. Россия Федерациятын Федеральнай Мунньаҕын Федерация Сүбэтин бэрэссэдээтэлин солбуйааччытынан үлэлээбитэ. 2011-2016 сс. РФ Судаарыстыбаннай Дууматын VI ыҥырыытын депутата. Саха Өрөспүүбүлүкэтин Судаарыстыбаннай сүбэһитэ. Сэтинньи 13 күнүгэр С.Д.Флегонтов аатынан Хадаар орто оскуолатын «Движение первых» бастыҥнар хамсааһыннарын кытары (сал.Л.И.Лукина) бастакы бэрэсидьиэҥҥэ анаммыт медиа-урок ыытылынна. Уруокка Михаил Ефимович Николаев бэлиитикэтэ Саха сирин олохтоохторугар суолтатын, Саха сирин сайыннарыыга турууласпыт үлэлэрин туһунан сырдатылынна.
«Норуот күүһэ-көмүөл күүһэ» — Хадаар нэһилиэгин тэрилтэлэрин эр дьоно, улахан сүһүөх кылаас уолаттара үтүө үгэстэри үөрэтэр, аҕам саастаахтарга, кыамматтарга, анал байыаннай дьайыы кыттыылаахтарын дьиэ кэргэннэригэр дириҥ ытыктабылы иҥэрэр сыаллаах сылын ахсын муус ылан биэрэллэр. Быйыл да үгэс быһыытынан үтүө дьыалаттан туора турбакка нэһилиэк 16 киһитигэр ыраас мууһу ылан, ыалларынан тиэйэн биэрдилэр. Кыһыны туоруур муустанан дьоммут-сэргэбит үөрүүлэрэ, махталлара муҥура суох.
