Нэһилиэк кэрэ эйгэлээх солуннара
Балаҕан ыйын 6-21 күннэригэр Яна Васильевна Климова салайааччылаах С.Д.Флегонтов аатынан Хадаар орто оскуолатын “Иэйии” театральнай студията 15 сыллаах үбүлүөйүн көрсө Улуу Кытай сиригэр аан бастыкытын ыытыллыбыт норуоттар икки ардыларынааҕы «Венера у моря» куонкурус-бэстибээлгэ кыттыыны ылан, сири-дойдуну көрөн сырыылара табыллан «Пой мой хомус» хомус доҕуһуолугар II ист. лауреат, «Якутия родина моя» ырыанан I ист. лауреат, «Элбэҕи уйбут Ийэ сир» испиктээгинэн Гран-При үрдүк аатын ылан, үөрэн-көтөн, өрөгөйдөрө үрдээн кэлбиттэрэ. Алтынньы ый 18 күнүгэр “Иэйии” театральнай студия төрөппүттэригэр, нэһилиэнньэҕэ анаан Кытайга сылдьыбыт сырыыларын, ситиһиилэрин кэпсии, көрдөрө сэргэх кэнсиэри көрдөрдүлэр.
Бу күн салайааччыларга Яна Климоваҕа, Елена Харитоноваҕа эҕэрдэ, махтал тыллары «Хадаар нэһилиэгэ» тыа сирин түөлбэтэ (баһ. А.Степанов), С.Д.Флегонтов аатынан Хадаар орто оскуолатын администрацията (дир.П.Тарасов), «Тускул» КСК (дир.Н.Дьячковскай) эттилэр, бэлэхтэрин туттардылар. Оҕолор олус кыһаллан, долгуйан туран солун нүөмэрдэри көрдөрдүлэр, үөрүүлэрин бииргэ үллэстибит дьонноругар истиҥ махталларын анаатылар.
Алтынньы ый 18 күнүгэр “Эгэй-сэгэй” сахаэтнофитнес түмсүү салайааччыта Парасковья Васильевна Гладкина – Алыптаана Хадаар нэһилиэгин кэрэ аҥардарыгар, ийэлэригэр анаан сахалыы музыка доҕуһуолунан хамсаныыларын оҥорторон сэргэхситтэ, дьарык ыытта. Бу дьарык биир тэтимҥэ киирэн кэрэ эйгэҕэ, чэгиэн-чэбдик сылдьарга, үҥкүүттэн дуоһуйууну ылыыга киьи үс кута ситимнэһиитин кэпсиир. Күннээҕи түбүктэн быыс булан салҕыы бу тэтими ыһыктыбакка, эгэй-сэгэй үктэнэн, дьарык оҥостон хамсанаргытыгар баҕарабыт.
Алтынньы ый 22 күнүгэр Ийэ декадатын чэрчитинэн Чурапчытааҕы дьиэ кэргэҥҥэ элбэх өҥөнү оҥорор киин специалистара Наталья Софронова, Лена Попова ийэлэргэ анаан гипсэнэн маастар-кылаас ыыттылар, киин үлэтин сырдаттылар, бу киин хайдах-туох үлэлээҕин туһунан билиһиннэрдилэр, тустаах дьоҥҥо консультация биэрдилэр, боппуруостарга эппиэттээтилэр. Сирэй көрсөн олорон, ирэ-хоро кэпсэтэн, сүбэлэрин ылынан ийэлэр олуһун астыннылар, билиилэрэ кэҥээтэ, сэргэхсийдилэр. Инникитин өссө да үлэлэһиэхпит диэн эрэнэбит.
Алтынньы ый 21-22 күннэригэр оскуола библиотеката холбоһуктаах Саха улуу суруйааччыта Константин Николаевич Дьячковскай-Туйаарыскай төрөөбүтэ 110 сылыгар анаммыт «Тыл чахчылаах маастара» 2-3-4 кылаас үөрэнээччилэригэр литературнай чаастары ыыттыбыт.
Тэрээһиҥҥэ алын сүһүөх кылаас оҕолоро актыыбынай кыттыыны ыллылар. Константин Туйаарыскай туһунан оҕолорго билиһиннэрии, оҕо тылын уус-уран айымньынан байытыы, оҕо толкуйдуур, саҥарар дьоҕурун сайыннарыы, Хоһоону мнемотехника технологиятын туһанан өйтөн ааҕарга үөрэтии, төрөөбүт норуотун ытыктыырга, киэн туттарга иитии сыаллаах-соруктаах ыытылынна. Оҕолор мнемоника ньыматынан хоһоону олус түргэнник ылыннылар, бэйэлэрин холоннулар. Бу Константин Туйаарыскай суруйар ньыматын сүрүн уратыта – оҕо тылынан, оҕо өйдүүрүнэн олох араас түгэннэрин сатабыллаахтык уонна арылхайдык ойуулууругар буолар. Салҕыы «Уон остуоруйа» хоһоонунан уруһуйдаатылар, түмүгэр хаһыат оҥорон таһаардылар.
Хадаар нэһилиэгэр анал байыаннай дьайыыга сылдьар биир дойдулаахтарбытыгар көмөнү оҥоруу үлэтэ салҕанан барар. Бары биир сомоҕо күүс буоллан, уолаттарбыт этэҥҥэ эргиллэн кэлиэхтэрэ диэн санаанан салайтаран, туох баар ыытыллар үлэҕэ, бэйэбит кылааппытын киллэрэбит. Бу күннэргэ Дьокууускай куораттан материал аҕалан маскировочнай сетка өрүүтүн саҕалаатыбыт. Баайыллыбыт сиэккэлэр олус наадалаахтарын өйдөөн, нэһилиэк олохтоохторо кыттыһан, ким бириэмэлээҕинэн кэлэн көмөлөһөллөрө улахан махталлаах дьыала.
