Эдэр ийэлэргэ сэргэх тэрээһин-«Сырдаа» хамсааһын.
Алтынньы ый 17 күнүгэр Саха сиригэр Ийэ күнүн декадатын чэрчитинэн Марфа Артемьева-Алтаана Сыдьаай «СЫРДАА» хамсааһына эдэр ийэлэргэ саҥа, солун «МАК- алыптаах киэһэтэ» тэрээһини тэрийэн, иилээн-саҕалаан ыытта. Хадаар нэһилиэгин эдэр ийэлэрэ кэрэ эйгэлээх библиотекаҕа муһуннулар. Киһини уоскутар, налытар эйгэҕэ араас оттортон чэй иһэ-иһэ истиҥ кэпсэтии арыллан, төһө даҕаны биир нэһилиэккэ олордоллор бэйэ-бэйэлэрин билсиһиннэрэн, сөбүлүүр дьарыктарын, баҕа санааларын үллэһиннилэр.
Онтон МАК-картанан хас биирдилэрэ расклад оҥотторон, тустаах ыйытыктарыгар сүбэ-соргу ылан бары астынан, махтанан тарҕастылар. Эдэр ийэлэр мантан ыла хам-түм маннык мустан көрсө туруоҕуҥ диэн баҕа санааларын эттилэр. Бу интэриэһинэй саҕалааһыны өйүүр, сэҥээрэр эдэр ийэлэр кэккэлэрэ кэҥээн иһэриттэн сүргэбит үөрэр, санаабыт сырдыыр. Бу курдук кэнэҕэски кэскили кэрэһэлиир, оҕо төрөтөн иитэр-үөрэтэр аналлаах эдэр ийэлэр үтүө түһүлгэлэрэ төрүттэнэн, үүннэллэригэр-сайдалларыгар үчүгэй эрэ өрүтү үөскэтиэ диэн эрэнэбит.
