«КЭРЭНИ КЭРЭХСИИР КИРГИЭЛЭЙЭПТЭР» уус-уран, искусство кэрэ эйгэтин быыстапката.
Балаҕан ыйын 20 күнүгэр Хадаар нэһилиэгэр библиотека кэрэ алып саалатыгар «Кэрэни кэрэхсиир Киргиэлэйэптэр» быыстапка аhылынна.
Быыстапка Хоту көһөрүллүү күнүгэр ананан, Хоту көһөрүллүү кыттыылаахтара Мария Михайловна, Никита Сидорович Григорьевтар оҕолорун уран тарбахтарынан оҥорбут оҥоһуктара турдулар.
Быыстапка нэһилиэк олохтоохторо, ыҥырыылаах ыалдьыттар кыттыылаах бэрт сэргэхтик ааста. Мустубут дьону биир дойдулаахпыт, СӨ култууратын үтүөлээх үлэһитэ Вера Никитична Старкова уонна кини бииргэ төрөөбүттэрэ уруйдуу-айхаллыы көрүстүлэр. Быыстапканы үөрүүлээхтик аһар аалай лиэнтэни Григорьевтар аймах улахан уоллара СӨ Тыатын хаһаайыстыбатын үтүөлээх үлэһитэ, олоҥхоһут, алгысчыт, Чакыр нэһилиэгин Бочуоттаах олохтооҕо Николай Никитич Григорьев, улахан саҥастара РСФСР култууратын туйгуна, Хоту көһөрүллүү кыттыылааҕа, 85 саастаах Мария Васильевна Григорьева, саҥастара РФ үөрэҕириитин туйгуна, Учууталлар учууталлара Лидия Егоровна Григорьева быстылар.
Кэлбит дьоҥҥо Вера Никитична тус Хоту күүс өттүнэн көһөрүллүүгэ баран төрөөбүт дойдуларыгар, хатыҥ-чараҥ алаастарыгар эргиллэн кэлбэтэх дьоммутун, биир дойдулаахтарбытын кэриэстээн ахтан-санаан кэпсээтэ, Вера Никитична кыыһа Сардаана Трапезникова уһулбут «Сүппэт санаа суолунан», Хатастааҕы «Кэрэчээнэ» уһуйаан иитиллээччилэрин уһуллууларыгар, Вера Старкова туруоруутугар «Көһөрүүгэ оҕо дьылҕата»киинэлэри көрдөрдүлэр.
Бу күн истиҥ тыллардаах ахтыылар, эҕэрдэ тыллар этилиннилэр, киһи кутун уйадытар ырыа-тойук ылланна, быыстапка биир тыынынан ааста. Көһөрүллүү сиэртибэтэ буолбут биир дойдулаахтарбытын кэриэстээн, түмсэ түһэн Дьокуускайтан, Ленскэйтэн, Хатастан, Чурапчыттан, Тааттаттан кэлэн быыстапка туруорбут Киргиэлэйэптэр аймахха улахан махталбытын биллэрэбит.
Хас биирдии ыалга дьолун биһигинэн кини көмүс ньээкэ уйата – сылаас, сырдык, ыраас дьиэтэ буолар. Бу күн салҕыы Киргиэлэйэптэр төрөөбүт, улааппыт, оҕо саастарын көмүс ньээкэ уйата буолбут «Аҕаларын Алгыстаах балаҕана» иккис тыыннанан малааһынын дьоро күнүгэр аймахтар муһуннулар. Үтүө дьоннор ааттара бу курдук үйэтилиллэн, удьуор утума салҕана туруохтун!
Балаҕан ыйын 26 күнүгэр диэри быыстапканы кэлэн көрүҥ, кэрэни кэрэхсээн!
