Улуу Кыайыыга анаммыт нэдиэлэ сонуннара.
Дойдубут Аҕа дойду сэриитигэр Улуу Кыайыыны ситиспитэ быйыл 80 сыла. Хадаар нэһилиэгэр үбүлүөйдээх сылга анаммыт кэрэхсэбиллээх, өйгө-санааҕа хаалар тэрээһиннэр Кыайыы күнүн инниттэн тиһигин быспакка үөрэх тэрилтэлэринэн, нэһилиэк иһинэн саҕаламыттара.
Улуу Кыайыы өрөгөйдөөх сылын айхаллаан турбут «Өйдүүбүт-саныыбыт, киэн туттабыт!», «СВОи родные» быыстапкаларга нэһилиэк олохтоохторо, ыччаттара күргүөмнээхтик сырыттылар, быыстапка тула кэпсэттилэр. Биһиги аҕа көлүөнэбит, ыччаттарбыт Кыайыы туһугар туруулаһан, үгүс сиэртибэҕэ баран эйэлээх олоҕу уһансыбыттарын умнуо суохтаахпыт.
Аҕа дойду Улуус сэриитигэр кыттыыны ылбыт, фроҥҥа бара сылдьыбыт буойун суруйааччылар тустарынан сырдатыллар «Буойун суруйааччылар — Аҕа дойду улуу сэриитин кыттыылаахтара» кинигэ быыстапката «Мичил» уһуйаан иитиллээччилэрин, төрөппүттэрин көрүүтүгэр турда. Быыстапканы уһуйаан үлэһитэ Лариса Павловна Лукина көрдөрөн, тэрийэн туруорда. Буойун суруйааччылар суруйан хаалларбыт айымньыларын, кинигэлэрин оҕо эрдэхтэн билиэхтээхпит, ааҕыахтаахпыт.
Ыам ыйын 6 күнүгэр «Брошь из георгиевской ленточки» брошь оҥоруутугар маастар-кылаас ыытылынна. Маастар-кылааһы нэһилиэкпит биир уран тарбахтаах иистэнньэҥэ Ирина Филиппова ыытта. Сылдьыбыт дьон биирдии лиэнтэни оҥорон, бэйэлэригэр бэлэх оҥостон бардылар. Маастар-кылааска материалынан көмөлөспүт «Тускул» КСК үлэһиттэригэр, дир. Николай Дьячковскайга махтанабыт.
Бу күн НВК Саха ханаалыгар «Олох үөһүгэр» биэриигэ Улуу Кыайыы 80 сылыгар анаммыт быһа эфирга, 5 бойобуой уордьан кавалера Семен Дмитриевич Флегонтов туһунан биир дойдулаахпыт СӨ култууратын үтүөлээх үлэһитэ, СӨ култууратын, үөрэҕириитин туйгуна Вера Никитична Старкова, С.Д.Флегонтов аатынан Хадаар орто оскуолатын дириэктэри иитэр үлэҕэ уонна оҕо общественнай түмсүүтүгэр сүбэһитэ, СӨ үөрэҕириитин туйгуна Лидия Ивановна Лукина студияҕа ыалдьыттаатылар. Биир дойдулаахпыт С.Д.Флегонтов олоҕун, хорсун быһыыларын, үйэтитиигэ туох үлэ барарын сырдаттылар, кэпсээтилэр.
«Бу биэриигэ дойдум дьонун көрдөһүүлэрин быһа гыммакка кытынным. Семен Дмитриевич хорсун быһыыларын мин бэчээттэн эрэ ааҕан билэрим. Кини дойдутуттан атын сиргэ үлэлээбит, олорбут буолан кыра сылдьан билбэт да, көрбөтөх да эбиппин. Ол эрэн бу уот сэриигэ сылдьыбыт хорсун санаалаах буойуттарбыт үүнэр көлүөнэҕэ холорбур буолан ааттара ааттана, хорсун быһыылара кэпсэнэ туруохтаах. Улуу Кыайыыны уһансыбыт, тыыннаах эргиллэн кэлэн дойдубут билиҥҥи сайдыылаах киэбин ылынарын туһугар күүстээх үлэлэринэн кэмэ суох кылааттарын киллэрбит, Хадаарбытын халыҥаппыт дьоммут ааттарын үйэтитэр ытык иэспитин толоро сылдьыаҕын» — диэн Вера Никитична санаатын үллэстэр.
Вера Никитичнаҕа уонна Лидия Ивановнаҕа С.Д.Флегонтов кыргыттара Светлана Федорова, Наталья Флегонтова аҕаларын туhунан «Олох үөhүгэр» биэриигэ кыттан үйэтиппиттэригэр барҕа махталларын биллэрдилэр. Улуу Кыайыы 80 сылынан оскуола коллективын эҕэрдэлээн, директор Петр Петровичка, педколлективка уонна үөрэнээччилэргэ бары ситиhиини баҕаран туран, оскуола үүнэрин – сайдарын туһугар 25000 тыһ. солк. бэлэх ууннулар.
«Олох үөһүгэр» биэрии режиссера Гаврил Захаров, ыытааччы Роман Алексеев.
9-с сылын Саха Өрөспүүбүлүкэтин күнүн көрсө «Символы Якутии. Я — патриот» олимпиада 2-8 кылаас оҕолоругар ыытылынна. Сыала-соруга: үөрэнээччилэри патриотическай тыыҥҥа иитии, Саха сирин историятыгар, култууратыгар интэриэһи тардыы. Быйыл Чурапчы улууһун үрдүнэн барыта 566 оҕо олимпиаданы оҥордулар. Хадаар нэһилиэгиттэн уопсай 27 оҕо кыттыыны ылбыта. Кыайыы күнүн көрсө түмүк тахсан 2 оҕо бириистээх миэстэҕэ тигистилэр. Хадаар орто оскуолатын 3-с кылааһын үөрэнээччилэрэ Ноева Анетта I миэстэ, Григорьева Мичийэ III миэстэни ылары ситистилэр. Кыттыыны ылбыт бары үөрэнээччилэрбитигэр, күүс-көмө буолбут педагог-библиотекарь Наталья Лукинаҕа махталбытын биллэрэбит. Инникитин өссө үрдүк ситиһиилэри баҕарабыт.
Ыам ыйын 7-с күнүгэр Кыайыы 80 сылыгар анаммыт «80 вопросов о войне» орто сүһүөх кылааһын үөрэнээччилэригэр викторина ыытылынна. Икки хамаандаҕа арахсан оҕолор илин-кэлин түсүһэн, иҥнибэккэ-толлубакка бэриллибит боппуруостарга эппиэттээтилэр, үчүгэй билиилээхтэрин көрдөрдүлэр. Түмүккэ «Мохсоҕоллор» хамаандалара I Үрдэли ылла. Бары кыттыбыттарга добун суруктар, минньигэс бэлэхтэр туттарылыннылар.
Улуу Кыайыы 80 сылыгар аналлаах Бүтүн Арассыыйатааҕы «Кыайыы түннүгэ» акцияҕа нэһилиэк олохтоохторо, тэрилтэлэрэ сылын ахсын кыттыыны ылаллар. Бу акция сүрүн сыала-соруга үүнэр көлүөнэҕэ бэлиэ күн үгэһин тиэрдии, 1941–1945 сылларга Аҕа Дойду Улуу сэриитигэр Кыайыы иһин толук уурбут дьоруойдарга, бэтэрээннэргэ махтаныы.
#ДеньПобеды #80летПобеды
#80летВеликойПобеды #спасибозаПобеду
#мирныеокна #9мая #праздничныеокна
#помнимчтимгордимся
#ОкнаПобеды #ОкнаПобеды2025