Хадаар нэһилиэгэр Улуу Кыайыы 80 сылын парада
Хаһааҥҥытааҕар да бүгүҥҥү күҥҥэ сайыҥҥылыы чаҕылхай күннээх, ыраас халлааннаах күн туран үөрүүбүтүн үксэттэ. Дьон-сэргэ, оҕо-уруу тоҕуоруһа мустан, өрө көтөҕүллэн Улуу Кыайыы 80 сылын көрсө Кыайыыны уһансыбыт буойуттарбытыгар махтанан, сүгүрүйэн Кыайыы парада буолла.
Кэриэстэбил миитинигэр нэһилиэкпит баһылыга Афанасий Степанов эҕэрдэ тылын анаан, Хоту көһөрүллүү кыттыылаахтарыгар, тыыл, үлэ бэтэрээннэригэр уонна сэрии сылын оҕолоругар кыайыы үбүлүөйүнэй мэтээлин, эҕэрдэ суруктары, бэлэхтэри туттарда.
Чурапчы улууһун социальнай харалтатын салайааччыта Лидия Васильевна Тосукаева парад кыттыылаахтарыгар эҕэрдэ, махтал тылларын этэн туран СӨ Ил Дарханын Айсен Николаев, «Чурапчы улууһа» МТ баһылыга Степан Саргыдаев эҕэрдэ суруктарын, үбүлүөйүнэй бэлиэлэрин нэһилиэкпит аҕам саастаах кырдьаҕастарыгар Марфа Никитинаҕа, Александра Софроноваҕа, Дмитрий Лукиҥҥа, сэрии сылын оҕотугар Ксения Игнатьеваҕа туттарда. Маны таһынан Анал байыаннай дьайыы кыттыылаахтарын дьиэ кэргэттэригэр «Чурапчы улууһа» МТ баһылыга Степан Саргыдаев, улуус депуттарын Сэбиэттэрин бэрэссэдээтэлэ Яков Оконешников эҕэрдэ суруктарын, бэлэхтэрин туттарда.
Бу күн эдьиийдии-балыс, Хоту көһөрүллүү кыттыылаахтарыгар, тыыл-үлэ бэтэрээннэригэр, нэһилиэк бочуоттаахтарыгар Марфа Никитинаҕа, Александра Софроноваҕа улуус сайдыытыгар киллэрбит сүҥкэн кылааттарын, үтүө суобастаах үлэлэрин иһин «Чурапчы улууһун Бочуоттаах олохтооҕо» ааты иҥэрдилэр. Бочуоттаах аат иҥэриллибитин нэһилиэк дьоно уруйдаан-айхаллаан үөрэ иһиттилэр. Ытык кырдьаҕастарбыт эдэр ыччакка алгыс тылларын анаатылар.
Эйэлээх олох кэлэрин туһугар ырыа-хоһоон дьиэрэйдэ, пааматынньыкка өйдөбүнньүк гирлянда, тыыннаах сибэкки уурулунна, полевой кухня үлэлээтэ, сүгүрүйүү бэлиэтинэн Кыайыы салюта буолла.
Тэрээһин иккис чааһынан нэһилиэк түөлбэлэрин икки ардыгар 11 этаптаах «Кыайыы эстафетата» ыытылынна. «Сардаҥа», «Эрэл», «Кэскил» түөлбэлэр олохтоохторо, кыратыттан, улаханыгар тиийэ илин-кэлин түһүстүлэр. Ыһыылаах-хаһыылаах күлүмэх сүүрүү түмүгүнэн «Эрэл» түөлбэ эрэллээхтик бастаата, «Кэскил» иккис миэстэ, «Сардаҥа» үһүс миэстэ.
Киэһээҥҥи өттүгэр «Улуу Кыайыы уостубат өрөгөйө» кэнсиэр, Аҕа дойду сэриитин кыттыылааҕа, 5 бойобуой уордьан кавалера С.Д. Флегонтов пааматынньыгар «Свеча памяти» акция буолуоҕа.
Улуу Кыайыы 80 сылын Хадаар нэһилиэгэ түмсүүлээхтик, сэргэхтик көрүстэ.
