Муниципальное бюджетное учреждение

Хадарская модельная библиотека

РС(Якутия), Чурапчинский улус, с. Юрюнг-Кюель, ул. Симы Сергеева, 17

Хадаар нэһилиэгин нэдиэлэтээҕи сонуннара

Ааспыт нэдиэлэттэн «Боевые шелкопряды» уопсастыбаннай хамсааһын Хадаардааҕы пуунугар анал байыаннай дьайыыга сылдьар биир дойдулаахтарбытыгар анаан хаххалыыр сиэккэни оҥоруу салҕанна. Манна олохтоох библиотека, тыа сирин сайдар киинигэр көхтөөхтүк сиэккэни оҥорууну ылсан, бүтэрэн бу күннэргэ Дьокуускай куоракка 9 сиэккэни оҥорон ыыттыбыт. Тэрийээччилэр бу үтүө дьыалаҕа кыттыспыт дьоммутугар махтанабыт, баҕалаахтары кэлэр да сырыыга күүтэрбитин биллэрэбит. Сиэккэлэри тиэрдиигэ утары баран ыйыталаспыт таксист уолаттарга Рустам Артемьевка, Иннокентий Андросовка, пууҥҥа тиэрдибит Василий Никитиҥҥэ, Петр Пудовка махталбытын тиэрдэбит.

Кулун тутар 19 күнүгэр улуус администрациятын аактабай саалатыгар «Чурапчы улууһун ытык сирдэрэ» хамыыһыйа сүбэ мунньаҕа буолан ааста. Тэрээһини Чурапчы улууһун култуураҕа управлениетын салайааччыта Петр Гуляев иилээн-саҕалаан ыытта. Мунньахха Хадаар нэһилиэгин ытык сирдэринэн дьарыктанар, үөрэтэр хамыыһыйа састаабыттан Афанасий Степанов, Наталья Лукина, Елена Харитонова, Лена Ноговицына кыттыыны ыллылар. Нэһилиэктэринэн матырыйааллары хомуйуу үлэтэ ханнык кэрискэҕэ тиийбитин ырытыһыы, санаалары үллэстии, ытык сирдэри пааспардааһын туһунан, эбии соруктары туруоруу буолла. Сүбэ мунньах түмүгүнэн муус устар 15 күнүгэр дылы матырыйааллары хомуйуу түмүктэнэрин иһитиннэрдилэр. Биһиги нэһилиэкпитигэр 10 киһиттэн турар састаабтаах «Хадаар ытык сирдэрэ» комиссия үлэтин тохсунньу ыйтан саҕалаан, былаан ылынан үлэлиир, матырыйааллары хомуйуунан дьарыктанарын иһитиннэрэбит.

 Кулун тутар 20 күнүгэр “Айылгы” оройуоннааҕы норуот аймньытын дьиэтигэр VII төгүлүн  култуура эйгэтин бастыҥтан бастыҥнарыгар “Чолбон” бириэмийэни туттарыы дьоро күнэ буолла. Бу күн «Ай» народнай студия тэрийэн ыыппыт Чурапчы улууһун нэһилиэктэрин ардыларыгар «Кыайыыны уһансабыт» көрүү-быыстапката буолла. Хадаар нэһилиэгиттэн уран тарбахтаах дьоммут оҥоһуктара дьон-сэргэ көрүүтүгэр турдулар. Быыстапкаҕа кыттыбыт Ирина Филипповаҕа, Саргылана Софроноваҕа, Айталина Федороваҕа, Евдокия Протодьяконоваҕа, Евдокия Григорьеваҕа, Вера Баишеваҕа, Вера Никоноваҕа, Варвара Тарбаховаҕа, Александра Елисееваҕа, Егор Елисеевка уонна туой оҥоһугунан кыттыбыт кыргыттарбытыгар истиҥ махталбытын биллэрэбит. Көрүү-быыстапка түмүгүнэн: сыахай, бэлэх оҥоһук хайысхатыгар Саргылана СофроноваДобун аат I үрдэлэ, төрүт иис хайысхатыгар Ирина ФилипповаЧулуу аат III үрдэлэ, туой оҥоһук хайысхатыгар – Добун аат II үрдэлэ ылары ситистилэр. Быыстапка кэннитэн  култуура күнүн көрсө тэриллибит «Чолбон” бириэмийэни туттарыы үөрүүлээх чааһа буолла. Нэһилиэкпит култууратын үлэһиттэрэ кыттыыны ыллылар.

Кулун тутар 22 күнүгэр «Эрилик кубогар» Хадаар, Дирин, Одьулуун, Хайахсыт дьахталларын икки ардыгар теннис күрэхтэһиитэ буолла. 10 киһиттэн турар хамаандалар биирдиилээн, онтон паарнай оонньууга кытыннылар. Теннис күрэҕэ олус тыҥааһыннаахтык буолан ааста, бэйэ-бэйэлэрин уруккаттан билсэр буоланнар истиҥ, доҕордоһуу сыһыаҥҥа ааста.

Хамаанданан түмүккэ Одьулуун нэһилиэгэ пъедестал үрдүк үрдэлигэр таҕыста. Иккис миэстэ Дириҥ уонна үһүс миэстэ Хадаар нэһилиэктэрэ буоллулар. 

Хадаарбыт теннисчит спортсмен кыргыттарыгар, салайааччы Мария Николаевнаҕа сүүрэн-көтөн, нэһилиэк туһугар туох баар сатабылларын киллэрэн туран бары кыттыбыккытыгар, тэрийбиккитигэр барҕа махталбытын тиэрдэбит.

Добавить комментарий

Ваш адрес email не будет опубликован. Обязательные поля помечены *