Улуу Кыайыы 80 сылыгар анаммыт тэрээһиннээх күрэх ааста.
Кулун тутар 15 күнүгэр Хадаар нэһилиэгин «Алгыс» бэтэрээннэр түмсүүлэрин көҕүлээһиннэринэн Улуу Кыайыы 80 сылыгар анаммыт Эрилик — Хоптоҕо, Хадаар, Хайахсыт, Чакыр нэһилиэктэрин икки ардыларыгар спартакиада буолан ааста.

Кэлбит күрэхтэһээччилэри «Уруйдаана» үһүс көлүөнэ үҥкүү бөлөҕүн кыттыылаахтара сылаас алаадьынан, арыылаах саламаатынан көрүстүлэр. Үөрүүлээх чааска «Хадаар нэһилиэгэ», «Хайахсыт нэһилиэгэ» тыа сирин түөлбэтин баһылыктара Афанасий Степанов, Тарас Тарасов эҕэрдэ тыллары эттилэр, ситиһиини баҕаран туран наҕараадалары туттардылар. Хадаар нэһилиэгин олохтооҕо, үлэ бэтэрээнэ, ССРС кинематографиятын туйгуна, улуус, өрөспүүбүлүкэ остуол тенниһин чемпиона, призера Мария Николаевна Протодьяконоваҕа үөрүүлээх быһыыга — майгыга «Хадаар нэһилиэгин Бочуоттаах олохтооҕо» ааты иҥэрдилэр. «Алгыс» бэтэрээннэр түмсүүлэрин бэрэссэдээтэлэ Мария Решетникова кэлбит ыалдьыттары эҕэрдэлээн туран, Мария Николаевнаҕа түмсүү аатыттан сибэкки дьөрбөтүн, бэлэҕи туттарда.

«Күрэхтэһии 5 көрүҥүнэн ыытылынна. Нэһилиэктэр остуол тенниһигэр, садуобаҕа, саанан ытыыга, дартска, хабылыкка, хаамыскаҕа илин-кэлин түһүстүлэр. Уопсай түмүккэ хамаанданан Хайахсыт — I миэстэ, Хадаар — II миэстэ, Хоптоҕо — III миэстэни ылары ситистилэр, кыайыылаахтар көһө сылдьар кубогынан, мэтээлинэн, грамотанан наҕараадаланнылар. Уопсай күрэхтэһии кэнниттэн дьахталларга, эр дьоннорго абсолютнай күрэхтэр ыытылыннылар. Кыайыылаахтар мэдээллэринэн, бириистэринэн бэлиэтэннилэр» — диэн Мария Романовна билиһиннэрдэ.




Хадаар нэһилиэгин бэтэрээннэрэ кэлбит ыалдьыттарга толору астаах фуршет тэрийдилэр, сандалы остуол тула тыл этэн эҕэрдэлэстилэр. Инникитин бу спартакиаданы сылын ахсын ыытар үтүө үгэс оҥоруоҕун диэн тарҕастылар. Бу маннык тэрээһиннэр ыытыллыылара, успуорду өрө тутарга, өйүүргэ туһуланара саарбаҕа суох диэн этэн туран, ыкса алтыһыыны, сомоҕолоһууну үөскэппит тэрээһин аны да өрүү буола турарыгар баҕарабыт.

Хадаар нэһилиэгин хамаандата.