Хадарская модельная библиотека

2024 сылтан нэһилиэкпит иһинэн Марфа Артемьева-Алтаана Сыдьаай «Сырдаа» хамсааһыны үлэлэтэн, дьон-сэргэ бэйэтин кыаҕын арынарыгар, ис туругун сааһыланарыгар үөрэтэр, сүбэ-ама биэрэр. Быйылгы үүммүт сылга нэһилиэк библиотекатыгар хамсааһын бастакы олуга уурулунна. Кэлбит дьоҥҥо Алтаана Сыдьаай айылҕа күүһүн туһанан, бэйэни арыныыга, куту-сүрү бөҕөргөтүүгэ араас ньыманы киһиэхэ өйдөнүмтүө гына билиһиннэрдэ.

Салҕыы уруһуйунан ыраастаныы (арт-терапия) ньыматын туһанан, өҥнөөх харандааһы өр туппатах, уруһуй уруһуйдаабатах дьон оҕолуу үөрэн-көтөн сэргэхсийдилэр.

Ол кэннэ чуораан лыҥкыр, хомус эмтиир дорҕоонноругар уоскуйууга, кэҥээһиҥҥэ (медитация) уйдардылар.

Маннык үөрэҕи билиэн-көрүөн баҕалаахтарга, чиҥ туруктаах, билиилээх буолалларыгар сирдиир Кулан Хаан кинигэлэрин билиһиннэрдибит. Бу кинигэлэртэн куту-сүрү сайыннарыы, ыраастаныы, эр киһи, дьахтар айылгытын арыйыы, оҕону иитии , уо.д.а киһи олоҕор улахан суолталаах тиэмэлэри ааҕан, билсиэххитин сөп.

«Сырдаа» хамсааһын чэрчитинэн хомуска бөлөҕүнэн уһуйуллуоҕун, сахаэтнофитнес хайысхатынан нэһилиэкпит далбардарын хамсаныыга, эрчийиигэ, көрүнүүгэ болҕомто ууруоҕун диэн тарҕастыбыт. «Сырдаа» хамсааһын салҕыы сайдан, билиибитин-көрүүбүтүн кэҥэтэн иһиэҕин диэн нэһилиэкпит олохтоохторун ыҥырабыт.