Хадарская модельная библиотека

 Саҥа дьылы көрсөр «2024-Сыл бастыҥнара» үөрүүлээх тэрээһин кэмигэр нэһилиэк олохтоохторун үгэс быһыытынан Тымныы оҕонньор сиэн кыыһынаан эҕэрдэлээтилэр. Ылбаҕай ырыалардаах, үҥкүүлэрдээх, оонньуулардаах көр-нар киэһэтэ буолла.

Бу киэһэни саҥа дьыллааҕы, бииртэн биир үчүгэй маскарааттар  тупсаран, киэргэтэн биэрдилэр. Маскараад күрэҕэр: I миэстэ-Ирина Филиппова (Карабас Барабас), II миэстэ-Парасковья Орлова (Буратино), III миэстэ-София Иванова (Мальвина) кыайыылааҕынан ааттанан Тымныы оҕонньортон бэлэх туттулар.

Ааспыт сыл түмүгүнэн, сэлиэнньэ тупсаҕай көстүүлээх буоларыгар саҥа 2025 сылы көрсө түөлбэлэр икки ардыларыгар «Ретро саҥа дьыл» күрэх биллэриллибитэ. Ол түмүгүнэн, ретро харыйаҕа, хаар-муус оҥоһукка дьон сэҥээриитин ылан, бастакы миэстэни «Эрэл» түөлбэ ылла. Ураты, киэҥ-куоҥ киэргэтиилээх түөлбэнэн «Кэскил» буолла, үһүс миэстэни «Сардаҥа» түөлбэ ылла. Тарбахтарыгар дьоҕурдаах дьоммут муус, хаар оҥоһуктары оҥорон, кырааскалаан, уоттаан-күөстээн дьон-сэргэ, оҕо-аймах көрүүтүгэр туруорбуттара ураты кэрэ көстүү буолла.

Тэрээһин түмүгэр «Саҥа дьыл — 2025 бэлэҕэ» сүүйүүлээх оонньуубут нэһилиэк иһинэн атыыланан ыытылынна. Саҥа дьыл алыптаах түгэнин, бэлэҕин нэһилиэкпит олохтоохторо сүүйэн «илии тутуурдаах, өттүк харалаах» үөрэн-көтөн тарҕастылар.

Саҥа дьыл тэрээһинигэр кэлэн кыттыбыт бар дьоммутугар барҕа махталбытын тиэрдэбит!