Сомоҕолоһуу күнэ нэһилиэкпит тэрилтэлэрин түмтэ
Сэтинньи 5 күнүгэр нэһилиэк культурно-спортивнай киин саалатыгар Сомоҕолоһуу, ил-эйэ күнүгэр анаммыт тэрээһин буолан ааста. Тэрээһин сыала доҕордуу сыһыан, түмсүүгэ, сайдыыга биир сомоҕо буолан олорорбутун бэлиэтиир. Бу күн олохтоох администрация, С.Д.Флегонтов аатынан орто оскуола, «Мичил» уһуйаан, нэһилиэк кыра тэрилтэлэрин (ветеринария, ФАП, «Тускул» КСК) холбоһуктаах хамаандалара илин-кэлин түсүһэн интеллектуальнай, спортивнай түһүмэхтэри аастылар.
Уопсай түмүккэ: I миэстэ — «Хадаар нэһилиэгэ» тыа сирин түөлбэтин хамаандата, II миэстэ — С.Д.Флегонтов аатынан орто оскуола коллективын хамаандата, III миэстэ — кыра тэрилтэлэр холбоһуктаах хамаандалара ыллылар.
Кыайбыт хамаанда көһө сылдьар кубогынан уонна кыттааччылар грамотанан наҕараадаланнылар. 3 сыл иһинэн Сомоҕолоһуу кубога хаһаайыннарын булуо диэн эрэннэрдилэр. Нэһилиэк олохтоохторугар көхтөөх кыттыыгыт иһин барҕа махталбытын кытта инники буолар тэрээһиннэргэ өссө күүскэ бэлэмнэнэн куруук кытта туруоххут диэн эрэлбитин биллэрэбит!
