«Сайыны уруйдуубут»
Ыам ыйын 24 күнүгэр Хадаар нэһилиэгин пенсионердара күөххэ үктэнэн самаан сайыны көрсө айылҕаҕа күүс-сэниэ ыла муһуннулар. Халлааммыт туран биэрэн, от-мас тыллан эрэр сыта, чыычаах ырыата, кэҕэ этиитэ, айылҕа саҥа уһуктан эрэр кэмэ буолан, дьон үмүөрүһэ мустан, үөрүү-көтүү үксээтэ. Сайыны көрсүү сири-уоту аһатыынан, салама ыйааһынынан, алгыһынан, буруоҕа ыраастаныынан саҕаланна. «Алгыс» пенсионердар түмсүүлэрин салайааччыта Мария Решетникова эҕэрдэ тылы этэн, үбүлүөйдээх дьоммутугар эҕэрдэ суруктары, бэлэхтэри туттартаата.
Ол кэннэ толору астаах сандалы тула олорон аһаан, кус амсайан, ирэ-хоро кэпсэтэн, хаартыскаҕа түһэн астыннылар.
Айылҕа амарах сыһыана бүгүн кырдьаҕастары алҕаата, арчылаата.